OL polis long NCD i bin holim biknem loya, Gregory James Sheppard bilong Young & Williams Lawyers long las wik Tunde na sasim em long paulim K52 milien mani bilong ol pipel bilong Westen Provins.

Spesel Polis Forensik Kriminal Investigeting Tim (SPFCIT) i bin kisim Mista Sheppard i go long Boroko Polis stesin we ol i sasim em long tupela (2) sas bilong misapropriesen na narapela tupela sas bilong mani londering long dispela K52 milien.

Mista Sheppard i gat 65 krismas na em i bilong Perth long Westen Australia.

Dispela K52 milien em i hap bilong K268 milen we i no bin gat tokorait na ol i rausim long Western Province People’s Dividend Trust Account (WPPD TA) narapela nem bilong en em Western Province People’s Dividens Community Mine Continuation Agreement Trust Funds (WPPD CMCA). Dispela akaun i stap long ANZ Bank.

Long mun Janueri long dispela yia, ol polis i bin holim Mista Sheppard na sasim em long tupela (2) sas bilong Konspirasi na narapela tupela (2) long Fols Pretens. I kam inap nau, ol polis i sasim em long eit (8-pela) sas.

Polis ripot i tok long 15 Februeri 2018,Ok Tedi Fly River Development Foundation Limited (OFRDFL) i bin kisim Mista Sheppard na lo kampani bilong ol long makim ol na kotim Gavman bilong Papua Niugini long planti ol asua.

Em i gohet long kotim nesenel gavman na i kisim Oda bilong Kot long kamap Trustee na kisim ples bilong lain gavman i bin makim, Board of Trustees (BOT) bilong WPPD CMCA TA long akaun bilong ol long ANZ Bank.

Ol polis i tok, bihain long OTFRDFL i kamap Trustee bilong WPPD CMCA TA, Mista Sheppard i helpim ol dairekta bilong OTFRDFL na yusim dispela Kot Oda long toktok wantaim ol opsa bilong ANZ BANK long senisim ol signetsa i go long WPPD CMCA TA.

Polis ripot i tok long taim ol i senisim ol signetsa bilong WPPD CMCA TA, ol i baim tupela peimen, K15 milien na K37 milien olsem ligal fi bilong loya long 17 Ogas 2018, na 23 Desemba 2019 i go long akaun bilong Young & Williams Lawyers Trust Account long Bank of South Pacific Limited (BSP). Dispela tras akaun akaun long BSP i gat signetsa bilong Mista Sheppard wanpela tasol.

Polis ripot i tok tu olsem Mr Sheppard wantaim ol arapela wanwok bilong em long lo kampani Young & Williams i bin toktok wantaim ol opisa bilong ANZ Bank long rausim mani inap long mak bilong K52 milien na salim i go long Trust Account bilong Young & Williams long BSP.  

Ripot i tok tu olsem long taim Mista Sheppard i kisim dispela mani, ol i bin spendim long ol arapela samting na i no long ol divelopmen projek long CMCA eria long Westen Provins. Em i bin salim K10.6 milien bilong K52 milien i go long wanpela kampani, Mundi No.1 Limited. Dispela i kampani bilong Seketeri bilong OTFRDFL, Samson Jubi. Mundi No.1 Limited i salim sampela bilong dispela mani i go long ol arapela dairekta na siaman bilong OTFRDFL. Mista Jubi i wanpela signetsa tasol bilong Mundi No.1 Limited na em i wokim ilektronik transfe long mani i go long ol arapela lain, long taim em i bin stap long Cairns, Australia.

Polis ripot i tok dispela pasin i brukim Seksen 7 (1) (c) bilong Kriminal Kod Ekt 1974 we Mista Sheppard i givim K10.6 milien long Seketeri bilong OTFRDFL na Seketeri i baim ol dairekta na arapela lain.

Polis ripot i tok tu olsem Mr Sheppard i salim K30 milien long dispela K52 milien i go insait long narapela Trust Account bilong Young & Williams long Westpac Bank PNG Limited (Westpac). 

Ol polis i kisim Kot Oda long sekap long tras akaun bilong lo kampani long Westpac Bank. Tasol Mr Sheppard i askim kot long stopim dispela, na em i winim kot na stopim ol polis long sekap. Ol polis i no inap long painimaut olsem wanem na Sheppard i pinisim K30 milien. Ol polis i bilip olsem i no gat moa mani i stap long dispela akaun.

Dispela mani bilong WPPD CMCA TA, long ANZ Bank em i bilong yusim long long ol divelpmen projek na program i stap long CMCA komyuniti long Westen Provins. Dispela eria i karamapim 158 viles long Fly River Coridor.

Polis ripot i tok long taim dispela K52 milien i stap long tras akaun bilong Sheppard long BSP, em i pinisim mani long ol arapela samting na i no long ol projek o divelopmen program bilong CMCA Communities. Dispela kain pasin em i misapropriesen.

Ol memba bilong SPFCIT i bin go long Daru long las wik long holim Steven Bagari, Siaman bilong OTFRDFL, tasol em i hait long ol polis. SPFCIT i askim ol arapela dairekta bilong OTFRDFL long lukim ol polis na helpim dispela investigsen.

Polis Komisina, David Manning, i givim oda long Provinsal Polis Komanda long Westen Provins na Polis Stesin Komanda bilong Not Fly, Midel Fly na Saut Fly Distrik long helpim wok bilong ol polis em lain bilong SPFCIT i wok long mekim nau.

Dispela Spesel Polis Forensik Kriminal Investigesen Tim em Polis Komisina, David Manning i go pas long en na i gat ol polis ditektiv, wanpela Forensik Akaunting Speselis na Ligel Kaunsi i kam long Dipatmen bilong Jastis na Atoni Jeneral.