GAVMAN i mas kamapim gutpela lo bilong Casino indastri, Jeneral Seketeri bilong Katolik Bisop Konprens (CBC) bilong Papua Niugini na Solomon Ailan, Pater Giorgio Licini i tok.

Em i tok sapos I gat strongpela lo, dispela bai banisim ol kain kain pasin nogut long kamap.

Em i mekim dispela tok long taim Nesenel Geming Kontrol Bod, i tokaut long statim Casino Indastri long kantri .

Em i tok i bai moa gutpela sapos palamen i bin sindaun na tok tok long dispela kain indastri bipo long em i kamapim dispela indastri.

“Dispela em i nupela samting long kantri na planti samting nogut i save pas long kain indastri olsem,” Pater Giorgio i tok.

“Em i gutpela long palamen i mas bung na givim taim long ol Memba long glasim na tok pait long gutpela na gutpela samting long indastri bipo long gavman i tok orait long em.

“Gavman bai sori long lukim planti hevi i kamap sapos em i no kamapim ol gutpela lo.”

Pater Giorgio i tok kain kain pasin nogut i save kamap olsem mani londring (money laundering) o kisim bikpela mani long wanpela kantri i go long narapela kantri long hait rot wantaim no gat save bilong gavman bilong tupela kantri, pasin pamuk, ediksen (addiction) o manmeri i pas tru long kain pilai na oltaim laik stap insait long pilai maski ol i no gat mani na famili i bruk.

“Sapos gavman i no laik lukim ol dispela kain hevi i kamap, em i mas glasim olgeta rot na kamapim ol gutpela lo bipo long em i kamapim kain indastri olsem,” Pater Giorgio i tok.

Pater Giorgio i tok i no gat asua long gavman i lukluk long kain indastri long mekim mekim mani.

Tasol em i tok asua i stap sapos em i no yusim gut mani long sapotim sindaun bilong ol manmeri.

Paul Zuvani i raitim