RUREL rais fama insait long kantri inap wokim ol bikpela gaden long planim moa rais sapot i gat mani na teknikol sapot.

Morobe Gavana Ginson Saonu i tok gavman bilong em i gat plen long helpim ol lokal fama na tu long baim sea long Trukai Indastri long ol pipel bilong Morobe.

Em i mekim dispela tok long taim em i go lukluk raun long ol lokal fama long Markham long las wik.

Wanpela wok painim bilong Fud na Egrikalsa Ogenaisesen (FAO) i soim olsem ol rural fama i save kamapim tupela tan bilong rais long gaden bilong ol tasol dispela mak i ken go antap moa sapos ol i kisim mani na teknikol sapot long kamapim ol bikpela maket long provins na kantri.

Saonu i tok Morobe i gat bikpela na gutpela graun we ol i no yusim yet na ol fama i ken yusim long groim rais na ol arapela samting wantaim.

“Sapos PNG i laik kamapim ol samting bilong em yet bai yumi inap long kamapim rais indastri na maski long harim ol giaman toktok bilong taim bipo olsem “kantri i no inap planim rais,” em i tok.

“Dispela toktok bilong bipo i no tru bikos mi bilip ol ovasis lain i laik stopim yumi long planim rais olsem yumi bai baim yet rais long ol.

“Mi sapotim Minista bilong Egrikalsa John Simon long strongim Marape-Basil polisi long kamapim domestik rais indastri.”

Soanu i tok promotim smolholda rais prodastsen bai helpim fud sekyuriti bilong rais long salim long gutpela prais na groim ikonomi.

Em i askim Nesenel Egrikalsa Risets Institut (NARI) long kamapim planti ol kain kain rais na tu long helpim ol fama long taim bilong sik bilong rais o hevi olsem disasta i no ken kamap.

“Mi save olsem NARI i bin mekim dispela ol samting pinis wantaim Trukai na ol intenesenel ogenaisesen olsem Intenesenel Ogenaisesen Rises Institut (IRRI) na JICA na Taiwan Teknikol Rais Tim,” Saonu i tok.

“Mi laik dispela primia egrikalsa risets na divelopmen institusen i helpim na mekim bikpela rais prodak insait long maket bilong yumi yet,” em i tok.

Joseph Dawai i raitim