OL HELT, edukesen na sios long wan wan distrik bai kisim taim nogut long kamapim projek bilong ol, Nu Ailan Provinsal Gavman (NIPG) i tok.

Nu Ailan Gavana Sir Julius i tok taim dispela kain sindaun i kamap, ol i no ken sutim pinga long gavman bilong em tasol long ol lokal memba bilong ol.

Em i mekim dispela tok long las wik long taim gavman bilong em i no gat mani long kamapim na sapotim ol projek bilong ol.

Em i tok dispela hevi i kamap taim Memba bilong Kavieng na Minista bilong Treseri, Ian Ling-Stuckey na Memba bilong Namatanai na Minista bilong Diwai, Walter Schnaubelt i subim Nesenel Ekseketiv Kaunsil long rausim pawa bilong NIPG long kisim royalti mani long Lihir Gol Main na givim i go stret long ol akaun bilong distrik.

Em i tok ol toktok insait long Malagan Dekleresen, Malagan Dekleresen Fowot na Nu Ailan Dekleresen bai i no inap karim kaikai.

Nu Ailan Gavana Sir Julius Chan i askim Sif Ekseketiv Opisa bilong Sabsidi Opis, Mactil Bais long holim kibung long las wik long tokaut long ol divelopmen patna husat i save givim helpim na i save kisim helpim long dispela sabsidi.

Em i tok dispela helpim i save go long ol helt, edukesen na sios long las 12-pela yia.

Ol stekholda i no amamas long senis i kamap.

“Mipela i save kisim gut helpim long dispela sabsidi long provinsal gavman, moa long lukautim ol boding sumatin tasol nau bai no gat,” John Tokmun, Prinsipal bilong Mangai Agro Sekenderi Skul long Nu Ailan i tok.

“I luk olsem no gat sapot nau bai kam, mipela sasim ol sumatin long baim K1000 skul fi long go skul.”

Tasol Sir Julius i tok dispela sabsidi mani em mani bilong ol pipel na ol i gat rait long askim ol memba bilong ol long kisim dispela mani.