EKTING Dairekta na Senia Etnomusikolojis bilong Institut bilong Papua Niugini Stadi, Dokta Don Niles i tok de bilong kalsarel daivesiti we i kamap long Me 27 i mas kamap wanpela spesel de bilong Papua Niugini.

Dokta Niles i mekim dispela tok insait long wanpela sotpela stori em i putim aut las wik.

Em i tok olgeta hap long Papua Niugini yumi wokabaut daivesiti i stap long pes bilong yumi. PNG i gat 851 tokples na long ol singsing bilong ples, ol bung bilong baim meri o mekim basket na bilum o paitim kundu, daivesiti em i stap.

Taim PNG i wok long redi long kisim independens em i bin givim luksave long ol as bilong daivesiti, em ol pasin tumbuna na tu long holimpas na karim ol i go bilong ol jeneresen i kam bihain.

Na em i stap tu long priembel bilong konstitusen o mama lo bilong kantri.

Insait long Tok Promis bilong Nesen (National Pledge) em i rit olsem;

Mipela ol pipel bilong Papua Niugini i promis long bung wantaim olsem wan nesen.

Mipela i promis long soim ol pasin bilong ol tumbuna bilong mipela, as bilong strong bilong mipela.

Mipela i promis long wokim sosaiti bai i holim strong pasin bilong ilektim ol lida bilong gavman wantaim astingting bilong stretpela pasin, wanmak, ona na kamap gut bilong ol pipel bilong mipela. Mipela i promis long sanap bung wantaim olsem wan pipel, wan nesen, wan kantri. God i blesim Papua Niugini.

Konvensen bilong UNESCO long banisim na promotim Daivesiti bilong Kalsa Ekspresen i selebretim kain daivesiti na i laikim olgeta i mas was long en na promotim em tu.

Dokta Niles i tok em wanpela konvensen ol i kamapim bilong PNG, long wanem em i toktok long PNG.

Em i taim PNG i mas givim fomol luksave long dispela impoten agrimen.

Ol pasin na veliu bilong UNESCO i bihainim tru dispela Konvensen. Na em i sanap strong long banisim na promotim ol kalsarel ekspresen.

Em i luksave long ikwal digniti bilong olgeta kalsa.

Na ol i was long ol liklik kalsa grup tu. Ol i banisim tu ol kalsa propeti, na promotim ol kain kain kalsa long toktok wantaim, na soim rispek long ol kalsarel rait.

Ol i promotim tu kamap bilong ol kalsarel polisi long promotim daivesiti na ol i lukautim ol kalsa long stap gut olsem ol i bin stap bipo yet i kam.

Rispek long human rait na fridom bilong wan wan manmeri na pikinini, em bikpela astingting bilong Konvensen.

Em i luksave olsem kalsa daivesiti na human rait na fridom i wan.

Konvensen i kontribut long mekim ‘difens bilong kalsarel daivesiti na em i bilong gutpela bilong olgeta na i ol i no ken lus tingting long rispek long human digniti.

Dokta Niles i tok em ol stretpela na gutpela samting long wanpela man o meri long PNG i ken holimpas na helpim long promotim kalsarel daivesiti.