MEMBA bilong Madang na Minista bilong Jastis, Bryan Kramer i tok wok bilong stretim ol baret long taun rot i stat nau.

Em i tok ol wok bilong stretim ol rot na drein em Madang Distrik Divelopmen Atoriti (DDA) yet i wokim wantaim masin em i haia long Madang Woks Dipatmen.

Wok bai stat long Baidal rot-bung na mein Modilon rot na bihain go long ol arapela rot insait long taun.

Em i no tok klia long taim wok bai pinis na tu long hamas mani Madang DDA i yusim long karimaut ol wok.

Em i tok arere long ol masin bilong Madang Woks Dipatmen, distrik edministresen i askim na yusim tu beko (backhoe) bilong Ela Enterprise Ltd, wanpela kontrakta husat i wok long provins.

Em i tok Ela i save sasim K3 long wanpela aua tasol Madang distrik edministresen i baim ol tasol long K1.50.

Kramer i askim manmeri long no ken kisim krangki tingting na tok distrik edministresen i givim kontrak wok long Ela Enterprise.

Em i tok edministresin i no putim wanpela edvetismen bilong tenda bod long ol kontrakta i aplai na kisim wok.

Em i tok Madang DDA i no kisim yet ol nupela masin bilong stretim rot.

James G. Kila i raitim