OL sumatin man long Yunivesiti bilong Papua Niugini i rausim ol midia long ol long ripot long hevi bilong jenda beis vailens (GBV) i  kamap long yunivesiti.

Dispela ol sumatin i  tok hevi i  kamap long yunivesiti i hevi i kamap insait long yunivesiti na i no samting bilong ol ausait long save.

Ol i tok yunivisiti i gat rot bilong stretim hevi na i askim yunvesiti edministresen long stretim.

Taim ol yunivesiti sumatin meri i protes mas i go long bikpela forum skwea, ol man sumatin i go long midia na i tokim ol long lusim ples na i no ken kisim nius.

Ol memba bilong yunivesiti kaunsil i bin stap long dispela taim tasol i no inap long mekim wanpela samting bikos ol i no gat inap namba long pasim dispela ol man sumatin.

Ol media harim dispela tok na i lusim kempes.

Sansela bilong Yunivesiti, Robert Igara i tok kain hevi i  no ken kamap.

Em i tok yunivesiti i ples bilong manmeri i  gat save na olsem ol i mas yusim dispela save ol i gat long skelim tingting.

Em i tok tu olsem yunvisiti bai askim Polis long kamapim ol risev polis long yunivesiti kempes.

Em i tok sekyuriti wok Uni Fos i mekim i no inap na i laik polis tru long lukautim lo na oda long yunivisiti.

Em i tok dispela wok bai stap long han bilong vais salensela long toktok na givim ripot i go long yunivesiti kaunsil na kaunsil bai mekim disisen.

Ol meri yunivesiti i protes bihain long wanpela sumatin man i bin laik bagarapim wanpela sumatin meri.

Ol meri sumatin i tok planti kain trabel i save kamap long UPNG kempes na dispela i no stret.

Ol i tok UPNG kempes i no seif long ol meri sumatin.