DIPATMEN bilong Haia Edukesen, Risets, Saiens na Teknoloji, (DHERST) i tekova nau long olgeta Haia Edukesen Institusen (HEI) em Dipatmen bilong Edukesen i save lukautim.

Toksave bilong dispela senis i bin kamap long Nesenel Gaset 28 Me, 2021. Na Miniista bilong Haia Edukesen, Ristes, Saiens na Teknoloji, Wesley Raminai i putim wanpela pablik toksave long ol niuspepa long Fraide.

Aninit long dispela bikpela senis olgeta pablik tisa koles long kantri bai muv i go stap aninit long DHERTS long 30 Me 2021. Ol dispela tisa koles em: Balob Teacher College, Dauli Teacher, Enga Teacher College, Gaulim Teacher College, Holy Trinity Teacher College, Madang Teacher College, Melanesian Nazarene Teacher College, Rabaul Campus DWU (Kabaleo), Sacred Heart Teacher College, St Benedict Campus DWU (Kaindi), St Peter Chanel College, Simbu Teacher College na Sanoma Teacher College, APU Campus.

Mista Raminai i tok olgeta pablik teknikel koles bai transfe long 30 Jun, 2021. Ol dispela teknikel institusen em:  Port Moresby Technical College, Bougainville Technical College, Madang Technical College, Mt Hagen Technical College, Goroka Technical College, PNG National Polytechnical Institute, Port Moresby Business College, Kokopo Business College, West New Britain Technical College, Western Province Technical College, Don Bosco Technical Institute, Sonoma Adventist College, Christian Leaders Training College, Highlands Agricultural College, PNG Maritime College Madang na National Fisheries College.

Dispela senis i bihainim tingting bilong gavman long senisim na strongim  haia edukesen sekta long kantri long givim trening we bai kamapim ol saveman na meri husat bai inapim kain kain wok em kantri i sot long en.

Mista Raminai i tok long Ogas 2020, Nesenel Palamen i kamapim ol lo we i opim rot bilong kamapim dispela senis long ol edukesen institusen long kantri.