OL STAT long kaunim ol vot long Mosbi Not-Wes bai-ileksen nau.

PNG Ilektoral Komisin i kaunim ol praimeri vot long Sir John Guise Stedum, Ben Moide Klap long Murray Barreks na Haunabada.

Tasol taim kaunting i stat long Mande yet, sut tok bilong paul pasin i kamap long Wod 7 kaunting senta long Murray Barreks.

Asisten Ritening Opisa, Rex Buka i tok sampela nem long tripela balot pepa bokis i no stret na skrutinia bilong ol kendidet i no wan bel.

Dispela i mekim na ol i pasim wok bilong kaun long 9 klok nait na i tok orait long kaunim ol vot long de tasol, stat long 9 klok moning na pinis long 6 klok.

Inap long 190 ilektoral opisa i mekim wok bilong kaunim ol praimeri vot.

Ilektoral Komisin i tok bihain long ol praimeri kaun, em bai kisim ol pepa i go long sental ples long PNG Administresen Koles we 42 ileksen opisa tasol bai mekim kwaliti sek na mekim elimenesen kaun.

Em i mas bringim ol writ i go bek long Gavman Haus long 22 Jun.

Inap long 42 kendidet i resis long dispela sia bilong Mosbi Not-Wes.

Bai-ileksen i kamap bihain long bipo memba Sir Mekere Morauta i dai long Novemba long las yia.

Komisin i yusim K3 milien long holim Mosbi Not-Wes bai-ileksen.

Poling i bin kamap long las wik Fraide 4 Jun.

Ekting Ilektoral Komisina, Simon Sinai i tok Komisin i bin surukim de bilong vot long 2 Jun i kam long 4 Jun bikos em i bin laik sampela ol stekhola we em i save wok wantaim long holim ol ileksen i mas stap bipo long bai-ileksen i ken go het.

Nesenel Kepital Distrik Metropolitan Polis Komanda, Gideon Ikumu i bin tok polis i kisim tok olsem ol opisa bilong EC i bin laik kisim sampela bokis bilong balot pepa long wanpela poling eria i go long narapela poling ples.

Ol i bin mekim dispela pasin long taim wanpela kendidet husat i resis tu long bai-ileksen i bin stap wantaim ol.

Moa yet, ol i mekim dispela pasin long taim polis i no bin stap wantaim ol.

Dispela i mekim polis i askim EC long pasim de bilong holim ileksen long 2 Jun pastaim long ol i stretim dispela hevi we ilkesen i kamap long 4 Jun.