CASINO indastri inap bagarapim laip bilong ol manmeri, famili, komyuniti na kantri wantaim, Opis bilong Katolik Bisop Konprens (CBC) bilong Papua Niugini na Solomon Ailan i tok.

Pater Giorgio Licini, Jeneral Seketeri bilong CBC i tok i gat gutpela na nogut bilong dispela indastri tasol planti pasin nogut tu i stap ples klia.

Em i tok em i gutpela long ol lain husat i papa bilong dispela indastri na ol lain husat i winim tasol i no gutpela long ol lain husat i lusim mani long ol kain kain pilai laki.

Em i mekim dispela tok long Wantok Niuspepa long dispela wik bihain long Nesenel Geming Kontrol Bod I tokaut long wok bung wantaim Paga Hill Developmen kampani long wokim wanpela Casino Hotel long Pot Mosbi.

“Tingting bilong winim planti mani I bikpela we ol i no wari sapos ol gat planti mani o nogat,” Pater Giorgio i tok.

“Sapos yu bilienea (billionaire), wan milien kina i samting nating.

“Long yu lusim K10,000 dispela em bikpela mani long ol Papua Niugini manmeri.

“Sapos yu lusim kain mani, bai no gat kaikai long tebol, no gat pawa, no gat mani bilong baim wara na rent haus, no gat mani bilong baim skul fi na no gat mani bilong go long haus sik o taim manmeri i dai.

“Bai yu stap tarangu, belhat, kros pait na famili i bruk.”

Pater Giorgio i tok Papua Niugini bai mekim mani taim ol i wokim Casino Hotel long Paga Hill long Pot Mosbi.

Em i tok, moa yet, indastri bai givim wok long ol manmeri.

Em i tok Gavman bai mekim mani, i no gat asua long dispela.

Tasol asua i stap sapos gavman i yusim gut dispela mani long sapotim sindaun bilong ol manmeri o nogat.

 “Em i bikpela asua long lukim kain indastri i amamasim tasol ol manmeri husat i gat mani,” Pater Giorgio i tok.

“Tasol em i bikpela sori long lukim ol liklik manmeri na ol yangpela bilong ples o setelmen i no gat gutpela ples bilong pilai ol gems.”

Em i tok kamapim ol gutpela ples bilong ol spot na kamapim ol spot em i gutpela samting long pasim tingting bilong ol yangpela long no ken pas long ol samting nogut.