KOREKSENEL Sevis Minista na Memba bilong Tambul-Nebilya, Win Bakri Daki i kisim ki bilong nupela banis, haus bilong ol kalabus na foapela nupela haus bilong ol koreksenel opisa long han bilong Menesing Dairekta bilong Chauka Builders long Manus long las wik Sarere.

Kost bilong ol dispela fesiliti em inap long K1.2 milien. Manus Provinsal gavman, Koreksenel Sevis na Dipatmen bilong Nesenel Plenning i bung wantaim long givim dispela mani.

Komisina bilong Koreksenel Institut, Stephen Pokanis i tok ol dispela fesiliti em bilong ol kalabus.

“Ol dispela haus i kamap long lukautim olgeta kalabus long PNG. Bai nogat wok bilong ol CS opsa sapos i no gat ol kalabus. Ol kalabus em ol lain husat i go sanap long kot na kot i painimaut olsem ol i mekim asua orait kot i salim ol i kam long ol haus kalabus. Wokmak i stap long han bilong ol CS opisa long lukautim ol kalabus,” Komisina Pokanis i tok.

Em i tok tenkyu long ol wokbung namel long Dipatmen bilong Nesenel Plenning, Manus Provins Gavman na ol arapela husat i bung wantaim long pinisim gut ol dispela projek long Manus Koreksenel Institusen.

Minista Daki tu i tok tenkyu long Manus Provins Gavman na ol Nesenel lida long kamapim dispela projek. Em i salensim ol kalabus olsem long stap insait long kalabus em i gutpela  samting na i no nogut samting.