KOMISINA bilong Polis, David Manning i laik bringim bek Risev Polis Program long redi long 2022 Nesenel Jeneral Ileksen.

Em i mekim dispela disisen bikos em i lukim olsem namba bilong ol polis opisa nau yet long kantri i go daun tru.

“Mipela nau i gat 6,300 memba tasol, na long dispela, ol 600 bai ritaia o pinis wok long arere bilong dispela yia 2021. Dispela bai daunim namba bilong mipela i go daun moa yet.

“Gavman i no bin givim inap mani long mipela olsem na mipela i no bin rikrutim polisman na meri na nau namba bilong mipela i sot tru,” Mista Manning i tok.

Em i tok sampela disisen i bin kamap long Nesenel Ekseketiv Kaunsil long apim namba bilong polis fos i go 10,000 long 2020 tasol ol i no bin inap long winim dispela mak.

“Dispela i mekim na mi mekim disisen long bringim bek Risev brens bilong Konstabulari. Tasol long dispela taim, bai mipela bringim ol i kam bek wantaim gutpela kodinesen, koman na kontrol, long helpim mipela long givim fri, fea na seif Nesenel Jeneral Ileksen long 2022,” Mista Manning i tok. 

Em i tok tu olsem ol polismanmeri i mas raun long wan wan komyuniti na toktok na bung wantaim pablik.

“I gat nid long pablik i mas lukim mipela olsem mipela i stap na mipela i mekim wok. Mipela i mas tingim olsem mipela i givim sevis na ol pipel em ol kastoma bilong mipela,” Mista Manning i tok.

Rebecca Negere i raitim