Moa long 150,000 pipel long Atonomos Rijon bilong Bogenvil na Milen Be Provins long Papua Niugini bai kisim helpim long wanpela projek bilong givim longpela taim helpim long ol meri na pikinini meri husat i bungim hevi long vailens insait long kantri.

Dispela tupela yia projek i op long las wik long Alotau Provinsal Haus Sik long givim ol kwaliti sevis na helpim ol meri na ol pikinini meri tu.

Astingting bilong dispela projek em long strongim nesenel helt sekta long givim ol sevis bilong rispon long ol lain husat i bin bungim hevi bilong vailens.

Milen Be bai kisim K700, 000 long strongim rispon bilong Provinsal Gavman long GBV insait long ol spesel helt sevis stap long ol Famili Sapot Senta.

Zonta International i givim US$1,000,000 i go long UNFPA long kamapim dispela tupela yia projek long PNG na Timo Leste, tupela kantri we i gat bikpela namba bilong ol man i paitim ol meri bilong ol.

Zonta International em wanpela ogenaisesen bilong wol we i save strongim ol meri wantaim sapot na sevis. Em i gat driman long lukim olsem i gat rispek long ol rait bilong ol meri na olgeta meri inap long mekim bikpela samting long laip bilong ol.

UNFPA em i seksual na riprodaktiv helt ejensi bilong United Nations. Na em i gat wokmak long helpim ol mama i gat bel, i mas gat bel bikos ol i laikim pikinini na taim ol i karim bebi, bebi na mama wantaim i mas seif na tu olgeta yangpela i mas mekim bikpela samting long laip bilong ol. 

Maus meri bilong UNFPA long PNG, Marielle Sander i tok 63 pesen bilong ol meri long PNG i save bungim vailens na long dispela namba husat i bungim vailens, 77 pesen bilong ol i save bungim vailens long han bilong patna bilong ol. Dispela em i bikpela namba tru em i tok.

Provinsal Edministreta bilong Alotau, Mista Ashan Numa na ol pipel bilong Milen Be i amamas long kisim dispela program.

Rebecca Negere i raitim