Asisten Polis Komisina na Polis Komanda bilong NCD na Sentral provins, Anthony Wagambie Jr i tok em i laik lukim olgeta wok bilong Mosbi Not Wes bai –ileksen i mas ran gut.

“Mipela i laik sapotim Ilektoral Komisin long taim ol i kaunim ol balot pepa inap taim ol i tokaut long nupela memba bilong Palamen long Mosbi Not Wes Ilektoret.

“Mi singaut long olgeta kendidet, ol skrutinia, ol sapota, na ol lain bilong vot long Mosbi Not Wes long givim rispek long wanpela na narapela na larim bel isi i stap insait long dispela ileksen proses,” Mista Wagambie i tok.

Mista Wagambie i tok, ileksen em i no nupela samting na ol hevi we i save kamap insait long ileksen na bihain long ileksen tu i no nupela samting. Olsem na ol polis bai strongim stretpela pasin na bel isi insait long dispela ileksen proses.

“Em i bikpela samting olsem ol pipel yet i makim lida bilong Palamen na makim maus bilong ol,” Mista Wagambie i tok. 

Metropoliten Suprintenden bilong Nesenel Kepital Distrik, Gideon Ikumu em i Operesen Komanda bilong sekyuriti insait long Mosbi Not Wes Ileksen.

Rebecca Negere i raitim