GAVMAN bilong Australia i givim K8 milien long mekim nupela Bogenvil Rijonal Jastis Senta long Buka.

Atonomus Rijon bilong Bogenvil (ABG) i luksave olsem Rijonal Jastis Senta em i namba wan samting long strongim wokbung bilong olgeta ejensi long Bogenvil.

Wok bilong kamapim dispela senta i stat pinis long mun Me na i bai kisim 12-pela mun long pinis. Dispela senta bai kamap olsem namba wan edministresen opis bilong lo na jastis sekta long Bogenvil. Em bai hetkwata bilong ABG Dipatmen bilong Jastis na Legal Sevis. Opis bilong viles kot na graun bai stap aninit long dispela tu.

Dispela senta bai lukautim tu opis bilong Pablik Solisita, ol Koreksen sevis bilong komyuniti olsem parol, probesen, na juvenail jastis. Bogenvil Jastis Sevis na Koreksenel Sevis tu bai stap insait long dispela senta.

Minista Kaunsila bilong Australia Hai Komisin, Diane Barclay i tok wankain olsem Buka, ABG na Gavman bilong Australia bai mekim rijonal jastis senta long Arawa na Buin tu.

 “Australia i bin sapotim lo na jastis long Bogenvil long yia 2003 yet na mipela i laik pas yet wantaim Bogenvil long divelopim em. I no longtaim i go pinis mipela i apim mak bilong ol lo na jastis program aninit long PNG Australia Patnasip we mipela i bin givim K161 milien long PNG na Bogenvil long ol jastis program bilong moa long tripela krismas,” Diane Barclay i tok.

Presiden bilong ABG Ishmael Toroama i tok tenkyu long gavman bilong Australia long sapotim Bogenvil. Em i singaut long ol pipel bilong Bogenvil long yusim gut dispela senta na ol arapela samting we i kam long ol diveloping patna bilong Bogenvil.