OPIS bilong pait egensim pasin korapsen, Trensperensi Intenesenel (TI) PNG i laikim wanpela Provinsal Ileksen Stiaring Komiti (PESC) i kamap bipo long Mosbi Not-Wes bai-ileksen i kamap.

TI PNG Bod Siaman, Peter Aitsi i tok dispela PESC bai lukim kamap bilong ileksen i fri, fea na seif.

Em i bin mekim dispela tok long Tunde long taim PNG Ilektoral Komisin (EC) i bin wok long redi long holim wanpela-de Mosbi Not-Wes bai ileksen.

Em i tok PESC i kamap bihain long 2012 Nesenel Ileksen long lukim provinsal gavman, polis, ol sios, sivil sosaiti, midia na ol arapela stekholda i helpim EC long holim gutpela ileksen.

Em i tok ileksen i ken kamap long gutpela mak taim dispela ol lain i stap.

“Dispela bai daunim planti ol hevi i pas long kot ov disputet riten,” Aitsi i tok.

“TIPNG i memba bilong PESC na bel bilong mipela bai gat hevi taim dispela ileksen i no kamap gut.”

Long wankain taim, Pot Mosbi Polis Komanda, Gideon Ikumu i tok ol polis opisa bilong em i redi long was long 112 poling we ol manmeri bai vot.

Em i askim ol opisa long wok gut.

Em i tok wok bilong polis i no bilong karimaut ileksen tasol long kamapim gutpela ples bilong ol manmeri i vot olsem no gat hevi i kamap.

Em i tokim ol opisa olsem ol i no ken gat bel hevi long ol sut toktok i kamap long midia o long arapela rot we i tok ol polis i no save wok gut.

“Nau i taim yu soim komyuniti yu inap karimaut gut wok bilong yu,” Ikumu i tok.

“Yu kamap polis opisa bikos dispela i singaut bilong yu.

“Yu mas wok gut bihainim tok promis yu bin mekim taim yu kamap opisa.”

PNGEC bai kaunim ol praimeri vot long wan wan ol tripela LLG bipo long ol i go long wanpela sentral ples na mekim ol eliminesen kaun.

Komisin bai kisim ol rit i go bek long Gavman Haus long 24 Jun.

Inap long 42 kendidet i resis long dispela sia.

Namel long ol em wanpela meri kendidet, Anna Kavana Bais husat i bin holim wok bilong Seketeri bilong Komyuniti Divelopmen, Yut na Relijen bipo.

Em i kempen aninit long Pipel’s Pati, em Rijonal Memba bilong Jiwaka, Dokta William Tongamp i palamenteri lida.

Ol arapela biknem man namel long 42 kendidet em man husat i bin Sif Jastis bipo Sir Arnold Amet, na Seketeri bilong Fainens bipo, Dokta Thaddeus Kambane, rana-ap bilong Mosbi Not-Wes ileksen long 2017 Jeneral Ileksen, Lohia Boe Samuel na pasto Joseph Tonde.