PNG Ilektoral Komisin (EC) i surukim de bilong holim Mosbi Not-Wes bai-ileksen long asde, Trinde i go long tumora Fraide, 4 Jun.

EC i tok i gat hevi i kamap insait long wok bilong em yet.

Ekting Ilektoral Komisina Simon Sinai i tok Komisin i laik sampela ol stekhola we em i save wok wantaim long holim ol ileksen i mas stap bipo long bai-ileksen i ken go het.

Em i mekim dispela tok long Tunde long taim EC i redi pinis long holim ileksen.

Nesenel Kepital Distrik Metropolitan Polis Komanda, Gideon Ikumu i tok polis i bin kisim tok olsem ol opisa bilong EC i bin laik kisim sampela bokis bilong balot pepa long wanpela poling eria i go long narapela poling ples.

Ol i bin mekim dispela pasin long taim wanpela kendidet husat i resis tu long bai-ileksen i stap wantaim ol.

Moa yet, ol i mekim dispela pasin long taim polis i no bin stap wantaim ol.

Dispela i mekim polis i askim EC long pasim de bilong holim ileksen pastaim long ol i mas stretim dispela hevi.

Dispela i mekim EC i surukim de bilong ileksen i go long Fraide.

Long wankain taim, opis bilong pait egensim pasin korapsen, Trensperensi Intenesenel (TI) PNG i laik wanpela Provinsal Ileksen Stiaring Komiti (PESC) i kamap bipo long Mosbi Not-Wes bai-ileksen i kamap.

TI PNG Bod Siaman, Peter Aitsi i tok dispela PESC bai lukim kamap bilong ileksen i fri, fea na seif.

Em i bin mekim dispela tok long Tunde long taim PNG Ilektoral Komisin (EC) i bin wok long redi long holim wanpela-de Mosbi Not-Wes bai ileksen.

Em i tok PESC i kamap bihain long 2012 Nesenel Ileksen long lukim provinsal gavman, polis, ol sios, sivil sosaiti, midia na ol arapela stekholda i helpim EC long holim gutpela ileksen.

Em i tok ileksen i ken kamap long gutpela mak taim dispela ol lain i stap.

“Dispela bai daunim planti ol hevi i pas long kot ov disputet riten,” Aitsi i tok.

“TIPNG i memba bilong PESC na bel bilong mipela bai gat hevi taim dispela ileksen i no kamap gut.”