RAMU Distrik Kot long Madang provins i kalabusim 8-pela senia Madang pablik sevan husat.

Polis i holim pasim ol bihain long ripot i kamap olsem ol i stap baksait long K6 milien we i lus nating long akaun bilong Manam Risetelmen Atoriti (MRA).

Ol dispela lain i bin putim pepa long polis-beil long Tunde apinun tasol Ramu Distrik Kot i tok nogat long ol.

Polis Fraud Skwat i bin holim pasim ol long Tunde moning bihain long ol i kisim ripot olsem  K6 milien em Nesenel Plening Dipatmen i bin putim i go long MRA akaun i no moa stap.

Mani i lus taim ol dispela ol 8-pela man i bin lukautim.

Namel long dispela ol senia pablik sevan em pastaim Madang provinsal edministreta, Joseph Kunda Bonomanena,  provinsal tresera na tupela narapela opisa bilong em.

Kot i holim ol i stap long Ramu polis stesen rum gad inap long taim ol bai kamap gen long de kot yet bai makim.

Ol arapela foapela opisa em polis i holim pasim ol i stap long polis stesin rum gat long Ramu Suga taun em ol wok lain bilong Ramu Divelopmen Kampani (RDC).

Dispela kampani em bisnis han bilong Madang provinsal gavman.

Wanpela long ol dispela lain em RDC menesing dairekta.

Polis bai mekim wok painimaut yet na bringim moa ol manmeri.

Polis fraud skwat ausait long provins i bin go long Madang na kisim ol dispela 8-pela lain na i bringim ol long Ramu Sugar taun long kot.

Dispela long wanem polis stesin sel long Jomba long Madang taun nau i no holim ol kalabus lain bikos long hevi bilong coronavirus (COVID-19).

Dispela i namba tu taim long polis i holim pasim Bonomane bihain long sas bilong MRA mani.

Long namba wan taim kot i rausim sas bilong em bihain long polis prosekusen i no bringim ol kot pepa we i karamapim wok painimaut i go long kot long taim kot i bin makim.