MINISTA bilong Environment Conservation na Climate Change, Wera Mori i singaut strong long ol pipel bilong Bogenvil, moa yet long lain i save stap long ol hap i gat mangoro olsem ol ailan na ol atol long lukautim gut ol diwai mangoro.

Em I mekim dispela singaut taim em i bin go long Buka long las wik long lonsim Bougainville Mangrove Planting Project.

Minista Mori i tok ol mangoro i save holim moa carbon dioxide winim ol diwai bilong graun. Ol mangoro tu i save karim planti kaikai bilong ol pis samting ol save kolim long "blue carbon'.

Astingting bilong dispela projek em long strongim ol manmeri long Bogenvil long planim na lukautim ol diwai mangoro.

Planti ol lain long ol kostal eria long Bogenvil na ol narapela hap long PNG i save katim diwai mangoro long wokim haus na long kuk wantaim.

Ol pipel i bin bung long Bel Isi Park long Buka taun yet long harim Minista Mori. Em i bin tok olsem, "Klaimet senis i trupela samting maski yumi ol liklik kantri i no wokim wanpela samting long kamapim dispela'.

"Ol bikpela na indastrialais kantri i kamapim dispela hevi tasol yumi olgeta i wok long pilim pen  bilong em " Minista Mori i bin tok.

Minista Mori i bin lukluk raun tu long planti narapela hap long Bogenvil na em i lukim ol hevi ol pipel i wok long bungim. Em i bin go long ol ples olsem Petats ailan long Not Bogenvil, Amun long Torokina, Wes Kos, Saut Bogenvil. Nau dispela wokabaut em i go long ol Cartret grup ailan we em i bin slip long wanpela nait.

Long ol sampela hap olsem Petats na tu long Cartrets em bin lukim olsem ol liklik bris bilong sip we i bin save pas long kisim pasindia na kago, i no moa stap bikos solwara i karapim pinis na long Amun em lukim olsem solwara i kaikaim pinis moa long 300 mita long graun long nambis.

Em i tok tenkyu long Rijonal memba bilong Bogenvil Peter Tsiamalili Jr. long helpim em long go long ol Cartret grup ailan na lukim stret long ai bilong em ol hevi ol pipel i wok long karim.

Em i tok ol wok painimaut bilong em bai em i putim long wanpela ripot na wantaim Rijonal memba bilong Bogenvil Peter Tsiamalili Jr. bai givim long Praim Minista.

Taim ol toktok na ol sampela entatenmen i pinis Minista Mori wantaim ol lain bilong em i bin go long nambis long Ieta viles na witnesim ol pipel i planim mangoro.

Bogenvil em wanpla ailan we ol pipel i wok long pilim hevi bilong klaimet senis na i kamapim pinis ol lain ol kolim ol "Klaimet Senis Refuji"

Nau yet sampela long ol lain bilong Cartrets ailan i lusim pinis ailan bilong ol bikos ino mo safe long stap long hap bikos solwara i kaikaim pinis planti long ol hap ol save stap na kisim kaikai long em.

Sampela long ol, gavman bilong Bogenvil i bin putim ol long narapela hap long Bogenvil main land.

Nesenal gavman tu i save long dispela hevi bikos ol narapela ailan provins olsem Manus tu i wok long bungim wankain hevi.

Olsem na National Gavman wantaim long Dipatment bilong Environment Conservation na Climate Change i wok long toktok strong long ol man/meri, mo yet long lain i save stap long ol ailan long ol mas planim na lukautim ol manguru bikos manguru em wanpela diwai i save lukautim nambis bilong ol ailan na i save karim planti kaikai bilong ol pis samting.

Paul Wagum i raitim