MADANG Provinsal Mains Dairekta, John Bivi i mekim bikpela askim i go long olgeta ol bikpela risos kampani long Madang provins long tokaut long kain ol fainensal helpim o royalti ol i mekim long wan wan yia long ol pipel bilong Madang provins.

Bivi i tok Madang provins i gat ol bikpela kampani husat i wok long fud prosesing, timba na ol arapela risos projek i mas soim wanem helpim ol i givim i go long Madang pipel taim ol i stap, wok na kisim ol risos long graun long ol pipel bilong Madang.

Em i mekim dispela tok bihain long Ramu NiCo Menesmen (MCC) i bin baim ol royalti mani i go long olgeta LLG long Madang provins.

Em i tok Madang i gat ol timba kampani na ol tuna na mit prosesing kampani na tu Ramu Agri bisnis long Gusap na I gutpela dispela ol kampani i tokaut long kain komyuniti sapot ol i givim long Madang provins.

Em i amamas long MCC long em i wanpela mineral divelopa long provins husat i statim prodaksen bilong en long 2013 na i wok long kamaut ples klia na tokaut long hamas royalti em i givim long ol papagraun na provinsal gavman.

Bivi husat i stap wok longpela taim olsem provinsal maining dairekta i mekim dispela tok long ai bilong deputi gavana bilong Madang Samuel Nessau, presiden bilong Sumgilbar LLG Brendan Kennedy, Madang Provinsal Polis Komanda (PPC) Suprintenden Mazuc Rubiang na Madang taun Mea (Mayor) Ismael Yama na ol wod memba bilong Sumgilbar LLG long Gibrin ples long Sumgilbar lokal level gavman kaunsil semba long not kos rot i no longtaim i go pinis.

Mista Nessau i sapotim ol toktok na i tok ol bikpela risos divelopa long Madang Provins i mas tokaut long Madang pipel long sosel na ikonomik divelopmen ol i bringim i go long provins.

James G. Kila i raitim