I GAT bikpela wok long inapim laik bilong ol pipel bilong Bogenvil long kamap independen kantri.

Man i go pas long Bogenvil Independens Misin, Atoni Jeneral bilong ABG na memba bilong Tonsu, Ezekiel Masatt i bin mekim dispela tok long taim ol i lonsim konstituensi Independens-Redi Misin program long Tanei viles, Tonsu Konstituensi, Not Bogenvil.

Em i tok olsem Referendum vot i bin bungim olgeta pipel bilong Bogenvil wantaim na ol i bin tokaut long laik bilong ol long lukim Bogenvil i kamap wanpela independen kantri.

“Bogenvil i  mas mekim ol samting bihainim ol lo bikos ol intenesenel komyuniti bai lukluk long wok redi bilong mipela na bai ol skelim sapos mipela i redi long kisim independens,” Atoni Jeneral Masatt i tok.

Long dispela taim tu Presiden Ishmael Toroama i tok, "Wok bilong redim Bogenvil long kamap wanpela independen kantri i stap long han bilong olgeta manmeri bilong Bogenvil.”

Konstituensi Independens-Redi misin i salensim ol konstituensi memba long go pas long redim ol konstituensi na pipel bilong ol long redim Bogenvil long kisim independens.

Ol kostituensi i mas kirapim wan wan  independens-redi misin komiti bilong go pas long dispela wok. Kostituensi memba yet bai kamap olsem Siaman long dispela komiti na Komyuniti Gavman siaman bai kamap namba tu siaman na ol narapela memba bai kam long ol wod, sios, yut, meri na ol narapela grup long komyuniti. Bikpela wok bilong dispela komyuniti em long go aut long ol wod na tok klia long wok redi bilong independens.

Presiden Toroama i salensim ol konstituensi memba long bihainim ol gutpela pasin na lukautim na yusim gut wanem mani i kam long han bilong ol long karimaut ol wok kamap.

ABG i bin vot long wanpela mosen long Novemba 2020 long kirapim Bogenvil Independens-Redi Misin.

Astingting bilong dispela misin em long redim na go hetim wokabaut bilong Bogenvil long kamap independen. Dipatment bilong Independens-Redi Misin i go pas long dispela wok. Pastaim ol bin save long dispela Dipatmen olsem Dipatment  bilong Peace Agreement na Implimentation.  Atoni Jeneral bilong ABG na memba bilong Tonsu Ezekiel Masatt i go pas long em.

Paul Wagum i raitim