SAMPELA distrik bilong Galp provins olsem Baimuru, Kikori na Ihu i laikim rot long impruvim laip bilong ol pipel long ol asples komyuniti bilong ol.

Presiden bilong Ihu Distrik Charles Maiu i mekim dispela toktok bihain long em i harim olsem Praim Minista James Marape i mekim komitmen long wokim rot i bungim tripela distrik bilong ol.

Maiu tok tenkyu long Praim Minista long mekim dispela komitmen long Ihu Petoie 15km rot konstraksen bai kamap.

Em i tok dispela rot tasol i ken bungim tripela distrik bikos ol West Port lain i save yusim dispela rot tasol i go kamap long Kerema taun.

Ihu Presiden i tok pastaim ol pipel bilong ol dispela distrik i save yusim solwara tasol sapos rot i kamap em bai mekim laip bilong ol pipel insait long mauten ples i kamap isi long go long Kerema i no olsem pastaim mipelai save painim hat long go long Kerema taim solwara i bagarap.

“Planti laip i bin lus long taim ol i bin traim long abrusim Tairuma wara long taim ol i laik go o kam namel long ol distrik na Kerema taun.

“Planti pipel long hap i save wok kuka, wokim saksak na salim buai long painim mani bilong helpim ol famili bilong ol.

“Sapos rot i bungim ol dispela distrik em bai mekim laip ol pipel long hap isi na ol inap mekim ol wok SME long helpim sindaun bilong ol long bihaintaim. Olsem na mi laik dispela rot konstraksen i mas kamap hariap long helpim ol pipel long dispela taim nogut bilong COVID-19 ol pipel i wok hat stret long painim gutpela laip we gavman bilong yumi long Waigani i save toktok i stap long en,” em i tok.

Maiu i tok rot em i impoten bikos long Papua LNG projek gavman bilong PNG i mekim K5 milien komitmen long rot projek na em i amamas tru.

Joseph Dawai i raitim