ROT o proses bilong karim ol veksin bilong COVID-19 i go insait long banis bilong haus kalabus i longpela tru na i nidim tok orait bilong menesmen, Helt Promosen Opisa bilong Nesenel Kepital Distrik Provinsal Helt Atoriti, Rhonda Tisap i tok.

Em i tok klia olsem em yet na ol tim bilong en i bin mekim ol awenes bilong COVID-19 na tu ol i bin opim rol aut bilong veksin pinis tasol long karim veksin i go insait long kalabus i no kamap yet.

Bikos em i tok ol i bai nidim planti dokta na ol helt woka na tu wanpela hap bilong veksinesen proses em olsem ol i bai putim ai ken long ol lain husat i kisim banis sut bilong COVID-19 o veksin long luksave sapos sampela nogut i bai kamap long bodi bilong ol o nogat bipo long ol i larim ol i go.

Rhonda Tisap i mekim ol dispela toktok taim em i go long Bomana haus kalabus long givim ol samting bilong banisim bodi long COVID-19.

Em na ol tim bilong en i go long Bomana i strongim ol kalabus long bihainim nupela pasin long lukautim ol yet long COVID-19 na werim pes mask na wasim han wantaim sop na wara olgeta taim bikos COVID-19 em i trupela samting.

“COVID-19 em i kam pinis na em bai no inap i go. Ol mesa bilong COVID-19 i stap long banisim yumi long kisim COVID-19 olsem na yumi mas bihainim ol,” em i tok.

Rebecca Negere i raitim