GAVMAN i mas strongim ol lo bilong daunim pasin bilong stilim mani bilong kantri long kainkain rot o Anti-Money Laundering na Counter Terrorism Financing (AML/CTF) Ekt kwiktaim bipo long kantri i bungim bagarap.

Transparency International Papua Niugini (TIPNG) i mekim dispela singaut i go long gavman bihainim sampela strongpela tingting i kamap long ol ejensi husat i save putim was long kantri. Ol dispela tingting i kamap ples klia taim TIPNG i holim namba wan Nesenel Integriti Bung bilong en long Pot Mosbi i no longtaim i go pinis.

Insait long dispela bung, TIPNG i luksave olsem em i bikpela samting long Gavman i mas apim mak bilong strongim AML/CTF Ekt. TIPNG i tok ol i painimaut olsem fainensal reguleta i salim 10,000 fail bilong ol stil pasin i go long ol kainkain ejensi bilong strongim lo tasol i nogat eksen i kamap long stretim ol dispela keis.

“Maski PNG i gat ol gutpela lo i stap, pasin bilong karimaut ol dispela lo na strongim ol em i no gutpela tumas. Sapos yumi no mekim eksen, PNG i stap long mak nogut. Ol interest reit bilong fainensim projek long kantri bai go antap tru na mekim ol foren invesmen i kisim taim. Na tu, wol i ken givim nem nogut long PNG olsem PNG em i stap long mak nogut bilong intenesenel tred,” Siaman bilong TIPNG Peter Aitsi i tok.

“TIPNG i singaut long gavman long nau yet apim mak bilong strongim lo bilong AML/CTF. Sapos yumi no mekim wanpela eksen bai i gat bikpela bagarap long ikonomi bilong kantri,” Mista Aitsi i tok.

Mista Aitsi i tok, insait long bung ol ejensi bilong strongim lo i tok ol i gat ol bikpela hevi insait long ol yet olsem ol i nogat mani na tu politiks i save bagarapim ol. Ol i laik gavman i mas lukluk long dispela na stretim long gutpela bilong ikonomi na ol pipel.

Rebecca Negere i raitim