Transparency International PNG (TIPNG) i singaut long ol bod memba bilong National Gaming Control Board (NGCB) long strongim wokmak bilong ol olsem reguleta o bikpela bos aninit long Geming Kontrol Ekt .

NGCB i tokaut las wik olsem em bai wokbung wantaim wanpela praivet kampani long kamapim kasino o haus bilong kain kain pilai laki long Pot Mosbi.

Dispela disisen i kamapim planti tingting long bisnis sekta long kantri.

TIPNG i singaut long NGCB long lukluk gen long dispela agrimen na no ken larim dispela i daunim wokmak bilong NGCB.

Ripot i bin tokaut olsem NGCB na Paga Hill Development Corporation (PHDC) i wanbel long mekim kasino we i bai kostim mani mak bilong K150 milien long ol namba wan hapwok bilong divelopim dispela projek.

“Sapos NGCB i wanbel long dispela tingting, bai em i no inap sanap strong olsem reguleta bilong indastri. Ol reguleta olsem NGCB i gat bikpela wokmak long strongim gutpela bilong ol opereta.

“Ol i wankain olsem ol referi na ol i gat wokmak bilong putim ol lo bilong gem. Ol i mas no ken stap olsem pilaia insait long fil. Ol dispela kain pasin i ken kamapim abius long ol lo na wansait long taim bilong mekim disisen,” Siaman bilong TIPNG Peter Aitsi i tok.

Mista Aitsi i tok, ol ekspiriens bilong kasino long wol i tokaut olsem i gat planti paul pasin na politiks i save daunim strong bilong ol reguleta.

“TIPNG i laik ol infomesen bilong MOU na fainens bilong pablik mani i mas kamap ples klia. Mipela i no laik long kamap wankain olsem bipo giaman toktok bilong 5-Star Boroko Casino Hotel we i no kamap,” Mista Aitsi i tok.

Rebecca Negere i raitim