OL 600 kalabaus manmeri na ol juvenail o yangpela pikinini man long Bomana Haus Kalabus long Pot Mosbi i kisim ol sampela helpim long Nesenel Kepital Distrik Provinsal Helt Atoriti (NCDPHA) na World Vision long las wik.

NCDPHA na World Vision i givim ol marasin bilong wasim han, ol pes mask na ol sop.

Ekting Komanda bilong Bomana, Dimon Gah i tok tenkyu long NCD PHA na World Vision long gutpela sapot ol i soim. Em i tok ol dispela samting bai mekim bikpela senis long laip bilong ol kalabus lain.

“Kisim ol samting long ausait i kam bai mekim bikpela senis insait. Em i bai helpim ol kalabus lain na ol edministresen tu,” Mista Gan i mekim dispela toktok taim em na ol lida bilong ol wan wan grup bilong kalabus lain i go long kisim ol dispela samting.

Helt Promosen Opisa bilong NCDPHA Rhonda Tisap i tok ol i bin mekim awenes long COVID-19 veksin na ol i opim pinis rol aut bilong veksin.

“Insait long awenes bilong mipela, mipela tokim ol kalabus olsem bai mipela i karim ol sop, marasin bilong wasim han na ol pesmask olsem na mipela i askim World Vision long helpim mipela long mekim dispela i kamap,” Tisap i tok.

Rebecca Negere i raitim