PAPUA Niugini Spesel Palamen Komiti long Jenda Bes Vailens i holim namba wan bung bilong harim ol
toktok bilong jenda bes vailens long kantri long dispela wik.

Komiti i harim olsem nesenel strateji bilong GBV we ol i lonsim long 2016 i stap pinis tasol em i mas
stiaim wok bilong stretim ol hevi bilong GBV. Long 2015 ol i kamapim wanpela eksen plen bilong adresim
ol vailens i kamap long ol sut tok bilong soseri.
Helt Minista Jelta Wong i tok ol plen i stap pinis i gutpela tasol ol i nidim nesenel gavman long kamapim
ol eksen long karimaut dispela ol plen.
Komiti i harim olsem i gat 1.4 milien keis bilong GBV tasol namel long ol 15,000 keis tasol i rejista na 300
tasol i save kamap long kot long wanpela yia.
Komiti i harim planti stori em i no gutpela tru long soseri, long man i paitim na kilim meri bilong em o
bagarapim pikinini meri.
Namel long ol ripot i kamap wanpela non-gavman ogenaisesen Tribal Foundation i mekim strongpela
singaut long kamapim lo we i sut long ol ‘glasman na sanguma’ we i wok long pretim ol pipel long kisim
mani tasol.
Ol komiti memba i mekim tok promis long adresim vailens long wanpela taim we moa hevi i wok long
kamap. Las wik wanpela dokta i kilim meri bilong em long Mendi na long Pot Mosbi wanpela papa i kilim
pikinini meri bilong em na planti moa stori i no kamap ples klia.
Ol komiti memba em ol sampela memba bilong palamen husat i sanap wantaim na i promis long helpim
long daunim hevi bilong vailens long Papua Niugini.
Bung i kamap long tupela de stat long Mande 23 Me na pinis long Tunde 24 Me. Long stat bilong bung
long Mande ples bung long APEC haus i pulap pinis bipo long ol memba bilong komiti i kamap.
Ol lain i kam long olgeta sekta we i save wok long daunim o stretim ol hevi bilong vailens. Namel long ol
em ol kolisen patna, gavman dipatmen, ol non-gavman olgenaisen na ol wan wan man na meri. Ol i
givim ripot long ol hevi ol i save lukim na wok wantaim, hevi bilong sot long mani na nogat sapot bilong
ol atoriti. Namel long ol ripot tu em ol namba bilong ol keis bilong vailens.

Rosa Koian i raitim