KUMURA Faundesen, wanpela komyuniti bes ogenaisesen long Bundi, Madang
Provins i stretim rot long Snow Pass pinis long helpim long bringim ol sik manmeri isi na
seif i go long ol helt senta long Simbu.

Dairekta bilong Kumura Faundesen Vincent Kumura i tok, “Planti ren long dispela taim i
bagarapim rot na i kamapim ol bikpela baret, na long sampela hap planti graun i bruk na
rot i wel na i mekim rot i no seif long ol kar i ken ran long en.
“Dispela rot bagarapim i stopim o mekim hat long ol rurel komyuniti long Bundi i kisim ol
besik sevis. Na bikpela samting em i no seif long karim ol sik manmeri na pikinini long
kar long dispela rot namel long Snow Pass na Mondia Pass Range.
“Olsem na mipela yet i mas stretim rot.”
Kumura Faundesen i givim bikpela tok tenkyu long Wildlife Conservation Society (WCS)
long Goroka long sapotim ol wantaim tupela fiul dram las yia we nau ol inap yusim.
Ol i tok tenkyu tu long tim bilong ol long Simbu, na ol arapela husat i helpim long
voluntia long taim na skil bilong ol na tu ol masin bilong ol, em wanpela D3 buldosa long
stretim rot.