INAP long wan kwata bilong ol diwai na plaua na abus long PNG i stap long rijon namel
long Mount Victoria, Kokoda Track na Mount Kenevei,

wanpela nupela ripot em Kokoda
Initiative na Konsevesen na Envairomen Proteksen Atoriti (CEPA), i kamapim i tok.
Zoolist (saveman bilong stadi long ol enimal) Dokta Allen Alison, husat i bin stadi long ol
enimal na ol bus samting bilong PNG stat long ol yia bilong 1970 i painim olsem rijon i gat
gutpela ples bilong lukluk na planti ol samting bilong bus we yu no inap long painim long ol
arapela hap bilong wol.
Dispela em ol i kolim baiolojikal endemisim na dispela i min Kokoda Track na ol bus i
raunim Owen Stanley Range rijon i mas kisim luksave long intenesenel luksave.
Stadi i painimaut olsem, bihain long moa long 70 milien yia bilong graun i kamap na ol
samting i stap long em, rijon i pulap long ol kain kain enimal na ol bus samting olsem ol
diwai na plaua wantaim ol kain kain arapela abus olsem pisin, pis, pukpuk, rokrok, snek na ol
mamal (magani, sikau, mumut) na 6700 ol plent.
Namba bilong ol samting i stap long rijon i bikpela moa taim yu bungim ol samting i stap
long bus long wan wan ol hap olsem Sautis Asia o Wes Afrika na sampela hap bilong
Amazon long Saut Amerika.
Long ripot bilong Allison, em i tok sampela samting yu painim long Kokoda Track em yu no
inap long painim long sampela hap bilong (Papua) Niugini tu.
Dispela stadi i kamap bihainim tingting bilong Gavman bilong Papua Niugini long salim nem
i go long UNESCO Wol Herites (Heritage) lis, long save sapos rijon i gat strong long kisim
intenesenel luksave olsem hap we i gat kain kain ol samting bilong bus i stap.
Wantaim kain luksave bilong bus na tredisen na kalsarel histori we i go bek moa long 50,000
yia, dispela inap long winim luksave bilong UNESCO olsem wanpela hap bilong Wol Herites
Lis.
CEPA i pinis wantaim ol gavman ejensi na lokal komyuniti long was na menesim Kokoda
Interim Proteksen Jon (IPZ) we planti ol kain kain samting ol i painim long stadi.