WAIGANI Komitel Kot Mejistret Tracy Ganai i witnesim Sentral provins Ekting Edministreta Fancis
Koaba i sainim agrimen pepa long kamap bod memba long Nesenel Kepital Distrik Komisen.

Sentral provinsal gavman nau i gat man i makim maus bilong ol long Nesenel Kapital Distrik Komisin
bod bihain long ol i makim em i kamap olsem Ekting Edmistreta.
Sentral provins i no bin i gat maus man o meri bilong ol long NCD bod inap tupela yia na long dispela
yia ol i makim Koaba long kisim ples olsem mausman bilong ol long las wik.
Koaba i tok orait long Tunde long ai bilong Waigani Komital Kot Mejistret Tracy Ganai long siti Hall
Annex long Pot Mosbi.
Mosbi Not Is MP John Kaupa, Siti Menesa Bernard Kipit, ol arapela NCDC bod memba na ol wok
manmeri, na Sentral Provinsal Atoriti wok manmeri i bin stap long witnesim dispela wok i kamap.
Gavana Powes Parkop i bin tok sori long em i no bin kamap long dispela taim tasol em i salim welkam
bilong em i go long Koaba.
“Mipela laikim kontribiusen bilong Koaba na laik wok bung wantaim em. Mipela laikim gutpela wok
poroman wantaim ol lida bilong Sentral provins. Yumi mas no ken kros pait na bagarapim sans yumi
gat long bihaintaim,” Parkop i tok.
Kipit i tok long taim bilong strongim ol disisen, hevi i bin kamap olsem long dai bilong Mosbi Not Wes
MP Sir Mekere Morauta, na i nogat inap namba long pasim strong tok bikos i nogat inap namba
bilong ol voting memba.
Komisina Kaupa i mekim wankain tok olsem Sentral provins i strongpela hap bilong wok divelpomen
bilong siti na Koaba em i impoten man long dispela kain taim.
Kaupa husat em i MP bilong Mosbi Not Is i singaut long Sentral provins long helpim na strongim sans
bilong kamapim wok hia long siti.

Joseph Dawai i raitim