LAS wik Sande, Mendi Katolik Daiosis i bin amamas long lukim 66 studen i greduet long Mother of
Divine Shepherd

Community Health Workers (CHW) trening skul.
Dispela bikpela selebresen i bungim namba 43 na 44 greduesen wantaim. Las yia i no bin gat
greduesen bikos long COVID-19 pandemik.
Bisop Donald Lippert OFM Cap bilong Mendi i bin go pas long bikpela misa bilong seleretim dispela
greduesen. Ol pris, relijes, famili bilong ol studen na ol arapela manmeri bin kam bung long dispela
misa. Lotu i bin kamap ausait long grensten bilong katedrel bikos long COVID-19 sefti protokol.
Long taim Bisop Lippert i givim skul bilong en, em i tokim ol nupela greduet olsem ol komyuniti helt
woka (CHW) em ol franlain pablik helt woka na ol i impoten long komyuniti. Em i tok ol i save long
komyuniti na i putim laip bilong ol pipel i go pas long wok bilong ol.
Em i tokim ol greduet olsem ol i kisim skil na save pinis. Orait nau ol i mas goaut na helpim ol arapela
pipel na soim lait long ol pipel husat i stap yet long tudak.
“ Dispela Trening Institusen i mekim wok bilong en long redim ol kwalifait helt woka long sevim ol sik
manmeri long ol rurel eria wantaim pasin bilong laikim na bel isi.”
Em i tok moa olsem, “Long taim Jisas i kam long wol, em i no autim Gutnius tasol. Jisas i soim
marimari bilong em long ol lain i sik na i gat hevi. Olsem na yupela ol helt woka tu i mas bihainim
pasin bilong em na lukautim gut ol lain husat i kam long dua bilong helt fesiliti.”
Prinsipel bilong skul, Sista Cathy Lepi Pilang i tok ol sios helt institusen i save bungim planti salens na
i laik wok bung wantaim gavman.
Em i tok ol dispela greduet i kisim save na bai ol i givim helt sevis long ol pipel i stap long ol longwe
ples olsem na em i impoten long Sios na Gavman long wok bung.
Dairekta bilong Sauthen Hailans Provinsal Helt Atoriti, George Epei i givim luksave long dispela skul
long trening na sapot ol i save givim long ol komyuniti helt woka na wok bilong pablik helt long
provins. Em i tok ol pipel long ol rural komyuniti i nidim sevis bilong ol franlain helt woka. Em i tok ol
dispela lain bai stap wantaim ol komyuniti na sevim ol pipel.