VOT bilong Mosbi Not-Wes bai ileksen i bai kamap long neks wik Tunde, 2 Jun, ekting
Ilektoral Komisina, Simon Sinai i tok.

Em i tok Komisin i trenim pinis ol ileksen opisa long redi long ranim ileksen long neks wik.
Em i tok dispela em i wanpela-de ileksen tasol na em i bilip ol vota na ol poling opisa bai
mekim gutpela wok na ol pipel bai vot gut.
Inap long 112 poling tim i redi long dispela ileksen.
Mista Sinai i askim tu ol manmeri long bihainim ol lo bilong COVID-19 sapos ol i laik vot na
moa yet laip bilong ol i stap gut.
Em i tok PNGEC na Nesenel Kontrol Senta i bin wok bung long skulim ol opisa long ol rot
bilong holim ileksen na bai no gat hevi bilong COVID-19 i kamap na bagarapim ileksen.
Em i tok bihainim ol toktok namel long tupela pati, em bai askim ol ileksen ritening opisa na
asisten ritening opisa long ol i no ken holim moa long 100 manmeri long wanpela bung.
Inap long 42 kendidet i resis long dispela sia.
Namel long ol em wanpela meri kendidet tasol, Anna Kavana Bais husat i bin holim wok
bilong Seketeri bilong Komyuniti Divelopmen, Yut na Relijen bipo.
Em i kempen aninit long Pipel’s Pati, em Rijonal Memba bilong Jiwaka, Dokta William
Tongamp i palamenteri lida.
Ol arapela biknem man namel long 42 kendidet em man husat i bin Sif Jastis bipo Sir Arnold
Amet, na Seketeri bilong Fainens bipo, Dokta Thaddeus Kambane, rana-ap bilong Mosbi Not
Wes ileksen long 2017 Jeneral Ileksen, Lohia Boe Samuel na pasto Joseph Tonde.
Komisin bai kisim ol rit i go bek long gavman haus long Jun 10.
Long wankain taim, Seketeri bilong Pablik Sevis, Taies Sansan i salim wanpela toksave i go
long olgeta gavman dipatmen na ogenaisesen long lusim ol pablik sevis husat i stap long
Mosbi Not-Wes Ilektoret long go vot.