OL KATOLIK bisop bilong Papua Niugini na Solomon Ailan i tok i no gat gutpela as long
gavman i kamapim inkwairi long mekim PNG i kamap Kristen kantri.

Presiden bilong ol Katolik Bisop Konprens (CBC) bilong Papua Niugini na Solomon Ailan
na bisop bilong Madang Asdaiosis, Anton Bal i tok ol bisop i givim luksave long tingting
bilong gavman tasol i tok kain rot em i bihainim long kamapim inkwairi i no stret.
Em i mekim dispela tok long wanpela bung em ol i holim long Pot Mosbi long las wik.
Dispela bung tu em Kardinal Sir John Ribat em Asbisop bilong Pot Mosbi Asdaiosis, Bisop
Otto Separy bilong Bereina Daiosis, Sentral Provins na Paul Harricknen, Presiden bilong
Katolik Profesinel Sosaiti i bin stap.
Em i tok i moa gutpela sapos gavman i bin kisim tingting bilong ol sios pastaim long ol rot
long tokaut long kantri i gat nem bilong Kristen bilip.
Em i tok em wok bilong ol sios long strongim ol skul bilong Jisas na tok bilong God na
luksave i stap pinis olsem PNG i Kristen i kantri.
Em i tok “Preamble” o stat bilong Mama Lo aninit long tok bilong Nesenel Gol na Dairektiv
Prinsipel long Seksen 45 i tok long manmeri i ken bihainim bilip na tumbuna pasin bilong ol
long sait bilong strongim bilip long spirit.
“Mipela i sanap antap long dispela tok na soim bilip na bihainim ol gutpela tumbuna pasin
bilong mipela,” Asbisop Bal i tok.
“Mipela i tok nogat long ol askim i stap insait long dispela inkwairi.
“I gutpela gavman i mas pasim dispela inkwairi.”
Kardinal Ribat i tok gavman i no ken mekim bilip i kamap wok bilong politik.
Em i askim gavman long pasim dispela inkwairi na go bek kisim tingting bilong ol sios
pastaim.
Em i tok gavman i no bin mekim wanpela askim long ol sios pastaim long em i kamapim
inkwari.
Em i tok moa olsem sapos gavman i senisim ol toktok i stap long Seksen 45 long Nesenel Gol
na Dairektiv Prinsipel, inap kamap hevi long Mama Lo.
Em i tok ol papa bilong kantri husat i bin kamapim Mama Lo i bin sindaun, kisim gut tingting
pastaim na kamapim na senisim ol tok inap bagarapim Mama Lo na dispela i no stret.
Em i tok dispela lo i givim fridom long wan wan manmeri long kain bilip ol i laik gat na
bihainim ol gutpela tumbuna na pasin kastom ol i gat long em.
Bisop Separy i tok PNG i Kristen kantri pinis long bilip na pasin bilong en.
Em i askim long wanem samting moa i asua olsem PNG i no Kristen yet na olsem gavman i
kamapim kain inkwairi olsem.
“PNG i Kristen kantri pinis long pasin na bilip bilong em,” Bisop Otto i tok.
“Senisim lo bai i no inap mekim PNG i kamap narakain o givim narapela piksa bilong
Kristen bilip.”
Mista Harricknen i tok gavman i no ken sensim lo bikos dispela bai kamapim bikpela asua
long Mama Lo bilong kantri.

Em i tok ol tok gavman i laik givim luksave long kantri olsem Kristen kantri i stap pinis long
Seksen 45 na 46 bilong Nesenel Gol na Dairetiv Prinsipel.
Em i tok Kristen bilip i no samting bilong lo na politik tasol i samting bilong bilip, spirit na
pasin bilong manmeri.
“Taim Pailat i askim Jisas long em i bilong we, Jisas i bekim na i tok, ‘Kingdom bilong mi
em i no bilong dispela graun. Sapos Kingdom bilong mi em bilong dispela graun, orait inap
ol wokman bilong mi i pait, na i nogat wanpela man inap putim mi long han bilong ol Juda,
a?” (Jon 18:33).
Harricknen i tok dispela as, tingting bilong senisim lo na inkwairi gavman i kamapim i no
stret.
Dispela inkwairi i kamap bihainim tok bilong Profesa Eugene Ezebilol, wanpela saveman
bilong Nesenel Risets Institut (NRI) long wok painimaut pepa bilong em long 2 Septemba,
2020 i tok, Mama Lo bilong kantri i no givim luksave olsem PNG i Kristen kantri na dispela
tok long PNG i Kristen kantri i no tru.
Profesa Ezebilo i tok long kantri i kamap Kristen kantri tru, tupela senis i mas kamap;
 I mas i gat tok long Mama Lo; na
 I mas gat Relijen (bilip) em gavman i mas go pas long em.
Praim Minista James Marape i sanap antap long dispela askim na i laik senis (amendment) i
kamap long Seksen 45 bilong Priembel bilong Mama Lo.
Em i askim Konstitusinel Lo Rifom Komisen (CLRC) long go pas long inkwairi na kisim
tingting bilong ol manmeri.
I gat foapela askim em ol mameri i mas bekim.
Dispela ol askim em:
 OL manmeri i ting PNG i Kristen kantri o nogat;
 PNG i mas bihainim ol Kristen Veliu na prinsipel; na
 Dispela ol veliu na prinsipel i mas stap long Seksen 45 bilong Nesenel Gol na
Dairektiv Prinsipel; na
 Bai i gat mekimsave taim manmeri i brukim ol veliu na prinsipel bilong Kristen bilip.