ASKIM i go long Atonomus Bogenvil Gavman (ABG) long givim luksave long Upe kalsa long
Totoga viles, Wakunai long Sentral Bogenvil.

Dispela askim em long makim wanpela de olsem de bilong soim dispela kalsa.
John Beato, kalsa na lida bilong Boiu klen long Aita viles long Wakunai (Sentral Bogenvil) i
mekim dispela tok long taim ol yangpela husat i stap insait long Upe i kam ausait long hait ples
bilong ol long las wik.
Upe kalsa i pasin kastom we ol yangpela i go insait long hait ples na lainim ol pasin long kamap
man.
Long dispela taim no gat wanpela meri na ol yangpela pikinini i mas lukim ol.
Moa yet, ol bai bungim planti traim long kisim strong long redi long bungim ol salens bilong
laip.
“Mipela i amamas long kalsa bilong mipela na olsem mi askim gavman (ABG) long makim
wanpela de bilong amamasim kalsa bilong mipela,” Beato i tok.
“Westen laipstail i wok long paulim tingting na pasin bilong ol manmeri tasol mipela long
Wakunai i strong yet long kalsa bilong mipela.
“Sapos i no gat wanpela samting i stap long strongim kalsa na dispela jeneresen i pinis, bai olsem
wanem long kalsa bilong mipela.”
Beato i tok nau i taim gavman i mas givim luksave na strongim ol hap we em i mas strongim.
Em i tok sindaun bilong ol komyuniti i sanap antap long ol samting i pas long bodi, tingting na
spirit bilong manmeri na kalsa i strongim sait bilong spirit.
Upe pasin i gat tredisisen veliu na i soim tu aidentiti bilong man.
Em i tok long taim ol arapela developmen i kamap, ol yangpela inap long lusim kalsa na inap
long lusim tingting long aidentiti bilong ol.
Em i tok tu olsem gavman i save kalsa i save pulim ol turis na dispela i ken helpim long
kamapim mani long rijon.
Em i amamas olsem ol arapela ogenaisesen olsem ( PNG na Bogenvil) Ilektoral Komisin i givim
luksave long Upe long taim bilong vot.
Em i tok Bogenvil Ritening Opisa, John Sisiesi i bin givim taim long 15 yangpela man husat i
stap long Upe long kamaut na vot long rijonal ileksen.
“Gavman nau i mas skelim wanem rot em bai kisim, long strongim o daunim kalsa,” em i tok.
“Gavman i tok long divelopmen, long mekim mani na olsem wanem long sait bilong spirit,”
Beato i tok.

Alex Munme i raitim