MINISTA bilong Jastis na Atoni Jeneral Bryan Kramer i tokaut long las wik olsem wok redi
bilong putim ol viles kot opisa long perol bilong gavman i stat pinis.

Em i bai askim Dipatmen long stretim ol pepa olsem wok bilong baim ol viles kot opisa i ken
kamap.
Kramer i no longtaim i go pinis i tok stat long 2015 inap olsem 5,250 viles kot opisa insait long
Papua Niugini i no stap long perol sistem bilong gavman na dispela i lukim ol i no bin kisim pe.
Em i tok bikos long dispela hevi, mani bilong baim ol i no stap long baset.
Em i tok Dipatmen i mas gat K24 milien long baim ol.
Minista i tokaut long dispela long taim em i toktok wantaim midia long Madang long las wik.
Em i tok liklik taim gavman bai baim ol.
Ol i givim dispela ol nem tu long Treseri, Fainens na Pesenel Menesmen Dipatmen long luksave
na makim alokesen bilong ol long ol mani plen bilong ol yia i kam.
Em i tok taim gavman i gat inap mani em bai baim bek ol long ol yia i go pinis long sevis ol i
givim.
“Em i no isi long kamapim kain wok, tasol mi statim proses pinis,” Kramer i tok.
“Mi askim pinis Opis bilong Viles Kot long Mosbi long kamapim ol woksop na givim gutpela
trening long ol opisa.
“Mi askim tu ol provinsal lo opisa long ol i wok wantaim mi olsem mipela i ken ol samting na
kamapim gutpela wok.
“Husat viles kot opisa i no wok em Dipatmen bai rausim nem.”
Kramer i tok wok bilong kot i bikpela samting na em givim moa taim long dispela eria.
Em i tok pastaim wan wan ol viles kot i bin gat faopela opisa na dispela em viles kot mejistret,
viles kot klak na tupela pis opia.
Tasol nau dispela namba i suruk i go antap long 8-pela opisa.
Kramre i tok inap 18,000 viles kot opisa i stap long kantri.

James G. Kila i raitim