PRESIDEN bilong Bogenvil Kristen Sios Asosiesen (BCCA), Pasto Albert Magoi i askim ol
manmeri long rausim mariuana o spak brus long rijon.

Em i tok sapos Bogenvil i laik lukim gutpela sindaun, ol i mas rausim dispela ol samting
nogut.
Pasto Albert i mekim dispela tok long taim em i go long Aita na Ipa viles long Wakunai,
Sentral Bogenvil long las wik.
“Sapos yumi laik Bogenvil i fri long mariwana na bringim senis long laip bilong mipela, orait
yumi mas wok bilong bringim gutpela sindaun,” em i tok.
“Yumi i mas rausim ol samting olsem spak brus.
“Yumi mas go long as bilong dispela ol samting nogut na rausim stret.”
Pasto Albert i tok rijon i tok long kisim independens tasol em i no inap long kisim
independens taim em i kisim dispela ol samting nogut i go wantaim.
Em i mekim dispela tok tu long taim ripot bilong lokal manmeri i pas long pasin bilong spak
brus.
“Yupela yet i save olsem spak brus i no inap long helpim yupela.
“Yu inap bagarapim helt bilong yu na kamap longlong.
“Yu inap mekim famili bilong yu i stap wantaim wari taim polis i holim pas yu.”
Pasto Magoi husat i go wantaim ol Pasto Luke Mauri na Bernard Namun long taim ol i autim
tok bilong God.
Ol tripela pasto aninit long BCCA i mekim wok long strongim bilip ol manmeri tu.
Ol i tok taim rijon i lukluk long ikonomik na fisikol divelopmen ol i mas senis tu long spirit
na kisim God long laip bilong ol.

Alex Munme i raitim