I BIN i gat sampela komplen olsem ol Famili na Seksuel Vailens Yunit (FSVU) i no save mekim gut wok
bilong ol.

Long Mande dispela wik long bung bilong Spesel Palamen Komiti bilong Jenda Bes Vailens (GBV) komiti i
bin askim polis Minista John Ongulo na Komisina David Manning sapos ol inap lukautim gut ol meri husat
i kam long FSVU.
Tupela het bilong polis wantaim i tok nogat.
Minista Ongulo i tok i gat nid long klia gut long wanem samting i rong.
Em i tok insait long FSVU i gat 150 wok manmeri tasol i wok long kantri olgeta na dispela i no inap long
givim gut sapot long ol lain i stap wantaim hevi bilong GBV.
Komisina Manning i tok i nogat fesiliti na risos long mekim dispela wok gut.
“Mipela i no stap yet long dispela mak. Mipela i nidim mani na moa wok manmeri long helpim long
senisim tingting na pasin bilong ol pipel,” em i tok.
Long dispela taim tu Dipatmen bilong Jastis na Atoni Jenerel tu i tokaut olsem ol tu i sot long wok
manmeri long helpim long lukluk long ol GBV keis.
Insait long kot sistem na Dipatmen bilong Komyuniti Divelopmen dipatmen tu i tokaut olsem ol i nidim
moa wok manmeri.