Jenda Beis Vailens (GBV) em bikpela wok salens insait long Papua Niuini maski mipela tok Kristen
Nesen tasol no gat senis i kamap long olgeta provins olsem na nau Komyuniti Divelopmen Yut na
Rilijon Dipatmen i mas kamap papa bodi long surukim wok bilong GBV long kantri.

Dispela bung bilong Spesel Palamen Komiti long Jenda Beis Vailens i bin tokaut klia long rot bilong
painim aut wanem wok na sapot bilong olgeta GBV keis i save kamap long kantri long pasin
Sanguma, kilim na bagarapim meri i mas stop nau bikos namba bilong GBV i go antap tru long kantri.
“Planti keis bilong ol meri i save kamap na nidim lo long arestim ol dispela man i mekim rong tasol no
gat sapot bilong lo tu olsem na mipela olgeta nidim jastis bilong ol meri husat i viktim billong dispela
GBV na stap long Seif Haus,” Operesen Menesa bilong Femili PNG Denga Illave i tok.
Gavana bilong Is Sepik Allan Bird i bin salensim Minista bilong Komyuniti Divelopmen Yut na Rilijon
Wake Goi wantaim Ekting Sekretari Jerry Ubase long kamapim strongpela bodi plen na kamap olsem
papa bodi bilong GBV long stopim.
“Mipela askim Gavman bodi long luksave long dispela bikos planti keis nidim sapot bilong Femili
Seksuel Vailens (FSV) na komyuniti long wok bung wantaim long wan wan traib bilong ol,” Illave i
tok.
“Mipela nidim gutpela lidasip long ol komyuniti na traib husat i ken givim gutpela ripot bilong GBV na
tu tokaut klia long stopim dispela pasin,” Faunda bilong VFC Jiwaka Lilly B’ Soer i tok.
Siaman bilong Spesel Palamen bung Charles Abel i tokaut klia olsem salens i stap namel long wan
wan komyuniti na famili long ripotim dispela kain GBV bilong sanguma o kilim manmeri nating.
“Bikpela hevi nau long Papua Niugini em long ripotim husat i wokim dispela hevi insait long
komyuniti tasol sapos wanpela i ripotim narapela em bai kamapim pait gen namel long tupela traib
grup,”Abel i tok.

Jacklyn Kimala i raitim