ATONOMUS Bogenvil Gavman (ABG) i laikim Bogenvil rijon i kisim independens bipo long 2025.

ABG Presiden Ishmael Toroama i tokaut long tingting na laik bilong gavman na ol pipel bilong Bogenvil long Join Supavaisori Komiti (JSC) miting long Kokopo, Is Nu Briten long dispela wik.

Em i tok inap long 97.7 pesen i bin vot long kisim independens long referendum.

Long dispela as nesenel gavman i mas bihainim laik bilong ol pipel na givim independens.

“Ol arapela kantri tu i givim luksave olsem Papua Niugini i mas givim independens long rijon bihainim mak bilong referendum,” Toroama i tok.

“Mipela i redi long kisim independens na i redi long ranim kantri bilong mipela.

“Mipela i bilip, taim mipela i kisim independens mipela inap long lukim gutpela sindaun.”

Toroama i tok long 2001 kibung long Arawa gavman bilong PNG na Atonomus Bogenvil Gavman i bin tok orait long Bogenvil i kisim independens.

Em i tok risalt bilong 2019 referendum i tokaut stret long tingting na laik bilong ol pipel long rijon.

Em i tok ABG i givim foapela yia long gavman i kamap wantaim disisen bipo long 2025.

Praim Minista James Marape i tok PNG gavman i redi long wok bung wantaim ABG long lukim rijon i lukim kain sindaun em i laikim.

Em i tok PNG na Bogenvil i serim wanpela kalsa, bus, ol maunten, solwara na i sanap long dispela long lukim tupela grup i kamap wantaim wanpela gutpela ansa.

Em i tok gavman i luksave long 2001 Arawa Pis Bilding Agrimen na i wok antap long ol toktok bilong dispela Agrimen.

Em i tok bihainim askim bilong ABG, em bai toktok wantaim palamen na moa yet, gavman i kamap bihain long 2022 jeneral ileksen long painim gutpela rot long surukim ol wok i go het.

Tasol maski ol wok i kamap, i gat bikpela luksave i stap, i no gat wanpela tok long Pis Bilding Agrimen we i tok long “gavman i mas bihainim tok bilong ol pipel long bruk” i stap long Mama Lo bilong kantri.

Dispela i min risalt bilong referendum i “non-binding.”

Em i olsem i nogat wanpela samting bai subim gavman long mekim disisen.

Disisen bai i stap long han bilong gavman yet.

 Michael Novingu i raitim