TRESERA bilong kantri, Ian Ling-Stuckey long las wik i bin toktok wantaim Asian Divelopmen Benk (ADB) long PNG i kisim dinau mani long helpim em long pait egensim sik coronavirus (COVID-19).

Dispela long helpim tu  wokim kamap na stretim ol rot long PNG we i bihainim tok bilong gavman long ‘PNG Connect’ program.

Ling-Stuckey i tok long kisim dinau mani long mani mak bilong US$2.2 bilien (K7.3 bilien).

Long video miting Ling-Stuckey i askim ADB Kantri dairekta, David Hill, tresera i olsem maski long kain kain salens Marape Gavman i go het yet long ol plen bilong strongim sindaun bilong ol pipel.

Em i tok tupela bikpela tingting nau bilong gavman em bilong pait egensim COVID-19 na long bringim trenspot sevis i go long ol manmeri olsem ol i ken isi long kisim ol besik sevis.

Ling-Stuckey i tok long dispela yia US$691milien (K2.303 bilien) na U$S 1.5 bilien (K5 bilien) gavman i kisim long ADB bai go stret long projek fainensing program long ol baset stat long dispela yia i go inap long 2024.

Ling-Stuckey i tok dispela ol dinau mani i kam aninit long konsesinol tems  (toktok) we PNG inap kisim sampela yia long bekim dinau tasol wantaim liklik win mani.

Ol yia bilong bekim dinau i ken kisim long 8 i go long 30 yia.

Em i tok nau yet dipatmen bilong em i wok long karimaut intenel asesmen o wok glasim long ol rot gavman bai bihainim long bekim ol dinau aninit long 12 pesen mak.

James G. Kila i raitim