ASKIM i go long Atonomus Bogenvil Gavman (ABG) long givim luksave long Totoga na Upe kalsa long Bogenvil.

Dispela long makim wanpela de olsem de bilong soim dispela ol kalsa.

John Beato, kalsa na lida bilong Boiu klen long Aita viles long Wakunai (Sentral Bogenvil) i mekim dispela tok long taim ol i holim wanpela bikpela so long Wakunai long las wik.

“Mipela i amamas long kalsa bilong mipela na olsem mi i askim gavman (ABG) long makim wanpela olsem de bilong amamasim kalsa bilong mipela,” Beato i tok.

“Westen laipstail i wok long paulim tingting na pasin bilong ol manmeri tasol mipela long Wakunai i strong yet long kalsa bilong mipela.

“Sapos nogat wanpela samting i stap long strongim kalsa na dispela jeneresen i pinis, bai olsem wanem long kalsa bilong mipela.”

Beato i nau i taim gavman i luksave na strongim ol hap we em i mas strongim.

Em i tok sindaun bilong ol komyuniti i sanap antap long ol samting i pas long bodi, tingting na spirit bilong man na kalsa i strongim sait bilong spirit.

“Gavman nau i mas skelim wanem rot em bai kisim, dispela long em i daunim ol pasin tumbuna o i strongim ol.

“Gavman i wok long toktok long sait bilong divelopmen, moa yet long mekim mani tasol em i mas lukluk long narapela sait tu,” Beato i tok.

Em i tok sapos i gat bikpela tingting long mekim mani, orait kalsa tu i ken helpim long bringim mani i go insait long Bogenvil.

Em i tok taim Totoga kalsa na narapela em Upe kalsa de i kamap, dispela bai lukim ol manmeri long ol arapela hap i go long Bogenvil olsem turis na lukim ol tumbuna pasin bilong ol.

Em i tok ol turis bai bringim mani i go wantaim ol na yusim long Bogenvil.

Alex Munme i raitim