LAS wik Katolik Bisop Konprens PNG na SI (CBC) i bin holim wanpela de bilong luksave long Wol Komyunikesen De.

Hettok bilong dispela de em ‘Kam na lukim’.

Dispela de tu em i de bilong ol famili na tu bilong Wol Telekomyunikesen na Infomesen Sosaiti.

Taim em i opim bung bilong dispela de Pater Ambrose Pereira sdb i tok amamas long wok bilong ol jenelis long kantri.

Na long wankain taim em i salensim tu ol jenelis long apim pasin bilong ol long wok na go ausait long ol strit na lukim na pilim wanem samting ol grasrut pipel i pilim.

Pater Ambrose i tok nius i no save kamap insait long nius rum we sampela jenelis i sindaun na lukluk long kompyuta tasol na ting em nius.

“I gat nid long go sindaun na harim stori bilong ol pipel long strit.”

Narapela samting Pater Ambrose i toktok long en, em gospel olsem nius. Em i givim tok piksa bilong Philip na Samaritan meri husat i stori wantaim Jisas na bihain tupela i go tokaut long ol pipel.

Em i tok bikos ol jenelis i go aut ol i givim nek long ol pipel husat i no save tokaut long wari bilong ol na ol i givim pes long ol dispela ol stori. Em i tok tenkyu long ol jenelis husat i givim taim long harim stori bilong ol pipel long strit.

Na sampela taim ol jenelis i save tokaut long ol samting we i mas kamap ples klia. Tok tru i mas stap oltaim em i tok.

Toktok long Telekomyunikesen na Infomesen Sosaiti De bisnis menesa bilong Katolik Bisop Konprens Jimmy Son i tok hevi bilong saiba sekyuriti i wok long kamap bikpela nau long Papua Niugini.

Mista Son i tok nau long PNG i gat planti kain kain infomesen i stap long intanet na ol pipel i mas no ken bilipim olgeta toktok long dispela hap.

Nau long dispela taim Mista Son i wok bung wantaim Dipatmen bilong Infomesen na Komyunikesen long kamapim seif intanet long PNG.