KAIRUKU Hiri MP Peter Isoaimo i laik banisim ol graun i stap long ilektoret bilong em long ol ausait lain i no ken kam kisim nating.

Isoaimo i tok em i impoten long olgeta papagraun i mas rejistarim graun bilong ol pastaim long ol i mekim dil wantaim ol ausait lain.

Em i mekim dispela toktok long taim em i bin sapotim wanpela lenona grup bilong Vanapa Brown Lokol Level Gavman (LLG) long  helpim ol long kamapim lenona asosiesen long lukautim graun bilong ol yet.

Memba bilong Kairuku Hiri i tokim ol papagraun olsem Pot Mosbi i wok long go bikpela na ol i wok long surukim boda bilong siti olsem na em i impoten long olgeta papagraun mas stretim pepa na rejistarim graun bilong ol.

“Wok i stap long han bilong yupela na yupela no ken wet long ol ausait lain long kam na divelopim graun bilong yupela. Yupela mas kamap wantaim plen bilong rejistarim lenona asosiesen na painim gutpela helpim long divelopim graun bilong yupela na i no long givim nating graun i go long giaman lain.

“Yumi mas wok bung wantaim long stretim pepa we yumi ken mekim dil long ol Milien Kina. Sapos yumi laik kamapim bikpela egrikalsa  projek bai yumi i gat inap mani long searim long olgeta pipel. Tasol yumi no ken slip na wet, ‘em i taim nau long yumi sanap na mov wantaim eksen,” em i tok.

Isoaimo i tok i gat planti sans taim pawa saplai i kam long Pot Mosbi long Brown Riva.

“Bilong wanem, mi kisim pawa saplai i kam long Hiritano Haiwe em long mekim wok bisnis mas kam na dispela i ken opim tingting na bilip bilong ol pipel,” em i tok.

Em i tok em bai kisim pawa saplai i go long Veimauri taim em i kisim sampela moa mani.

Isoaimo i mekim komitmen long K50, 000 long rejistarim ol lenona asosiesen wantaim Investmen Promosen Atoriti (IPA).

Joseph Dawai i raitim