OL MANMERI husat i vot long Mosbi Not Wes bai-ileksen long dispela taim i mas bihainim olgeta lo bilong coronavirus (COVID-19), ekting Ilektoral Komisin Simon Sinai i tok.

Em i tok COVID-19 i stap pinis long komyuniti na i wok long kamap bikpela.

Em i askim ol manmeri long bihainim ol lo sapos ol i laik stap gut.

Em i tok PNGEC na Nesenel Kontrol Senta i bin wok bung long skulim ol opisa long ol rot bilong holim ileksen olsem nogat hevi bilong COVID-19 i kamap na bagarapim ileksen.

Em i tok bihainim ol toktok namel long tupela pati, em bai askim ol ileksen ritening opisa na asisten ritening opisa long ol i no ken holim moa long 100 manmeri long wanpela bung.

Mosbi Not-Wes bai ileksen bai wanpela de vot na bai kamap long tumora, 21 Me.

Ol 42 kendidet i mekim ol las minit kempen.

Namel long ol em wanpela meri kendidet tasol. Dispela em Anna Kavana Bais, pastaim Seketeri bilong Komyuniti Divelopmen, Yut na Relijen.

Em i kempen aninit long Pipel’s Pati, em Rijonal Memba bilong Jiwaka, Dokta William Tongamp i palamenteri lida.

Ol arapela biknem man namel long 42 kendidet em pastaim Sif Jastis Sir Arnold Amet, na pastaim Seketeri bilong Fainens, Dokta Thaddeus Kambane, pastaim rana-ap bilong Mosbi Not Wes ileksen Lohia Boe Samuel na pasto Joseph Tonde.

Kaunim bilong vot bai kisim 21 de.

Komisin i mas kisim ol rit i go bek long gavman haus long Jun 10.

I gat 112 poling tim i redi long holim ileksen.

Long wankain taim, Seketeri bilong Pablik Sevis, Taies Sansan i salim wanpela toksave i go long olgeta gavman dipatmen na ogenaisesen long lusim ol pablik sevis husat i stap long Mosbi Not Wes Ilektoret long ol i stap fri na kisim taim na go vot.