JOIN Supavaisori Bodi (JSB) kibung namel long gavman na Atonomus Bogenvil Gavman (ABG) i bin kamap gut long dispela wik na i pinis tude.

Praim Minista James Marape na ABG presiden Ishmael Toroama i bin go pas long dispela bung long Kokopo long Is Nu Briten.

Bung i bilong lukim ol rot em tupela gavman i gat na i bihainim long bungim tingting bilong Bogenvil long kain stap bilong gavman em i laikim long bihain taim.

Bihainim Bogenvil “crisis”, na long kamapim bel isi, Bogenvil i bin holim referendum long 2019 na i bin mekim tupela askim i go long ol manmeri long Bogenvil long save sapos ol i laik gat moa atonomi long lukautim ol yet o bruk, lusim PNG na kamap independen.

Long dispela tupela askim, inap long 98 pesen i bin vot long kisim independens.

Kibung long Kokopo i kamap bihainim dispela ileksen na i laik save long ol rot em tupela gavman i gat long bungim dispela tingting.

Tasol maski sapos ol pipel i tok long kisim independens, i no gat wanpela tok long Pis Bilding Agrimen we i tok long “gavman i mas harim tok bilong ol pipel long bruk” i stap long Mama Lo bilong kantri.

Dispela i min risalt em “non-binding,” olsem nogat wanpela samting bai subim gavman long mekim disisen. Disisen i stap long han bilong em yet.

Aninit long Pis Bilding Agrimen na bihainim referendum, gavman i mas tokaut long tingting bilong em bipo long 2025.

Tasol Presiden Toroama i tok gavman i mas harim tok bilong ol pipel bikos bikpela namba bilong manmeri i laikim independens.

Marape i tok em bai lukluk long dispela na gavman bai wok hat long lukim rot Bogenvil bai stap long em.

Long Epril palamen kibung long las mun, nupela Bogenvil Rijonal Memba, Peter Tsiamalili Junia i bin tok gavman i no save baim gut Bogenvil long K500 milien mani em i tok long givim long wan wan yia na dispela ol hap mani i stap yet wantaim gavman.

Em i askim gavman long inapim komitmen bilong em.

Dispela em long lukim Bogenvil i kamapim gut ol wok long plen bilong em.

Em i no klia long dispela taim long hamas mani gavman i gat yet long baim Bogenvil long ol mani bilong em.

Kokopo bung i lukim Marape na Toroama i toktok tu long ol rot bilong givim moa pawa long ABG long lukautim em yet na ol rot em ABG i gat long strongim ikonomi bilong em.

Dispela kibung i bin inap long kamap long Novemba las yia, tasol bikos gavman i bin bruk long ol tingting bilong kamapim Vot i Nogat Bilip, dispela kibung i no bin kamap inap long dispela wik.

Dispela i namba wan JSB bung na ol bai holim narapela kibung long narapela taim bihain.