MANMERI i mas bihainim ol rot em Konstitusinel Lo Rifom Komisen (CLRC) i givim long bekim ol askim sapos ol i laik lukim senis, Siaman bilong CLRC na Memba bilong Wewak, Kevin Isifu i tok.

Em i tok gavman i no inap long senisim ol toktok i stap long ol Ogenik Lo (OL)  taim ol i no bihainim ol rot em CLRC i givim long bekim ol askim long senisim ol toktok i stap long OL.

Em i mekim dispela tok long taim komisen bilong em i mekim raun long wan wan ol provins long kisim tingting bilong ol manmeri sapos i mas i gat tok i stap long Mama Lo long tokaut olsem PNG i Kristen kantri.

I nogat wanpela kain tok i stap long Mama Lo long kantri yet.

Tasol aninit long Seksen 45 long tok bilong Prinsipel na Priembel (Stat) bilong Mama Lo, dispela tok tasol i stap: PNG i luksave long em yet bikos long tredisen (pasin kastom na tumbuna) na bilip em i gat long em.

Gavman na ol manmeri i sanap antap long dispela tok na i kolim ol yet olsem ol i Kristen na PNG i Kristen kantri.

Tasol wanpela saveman bilong Nesenel Risets Institut (NRI) Profesa Eugene Ezebilo long 2 Septemba, 2020 long wok painimaut pepa bilong em i tok, Mama Lo bilong kantri i no givim luksave olsem PNG i Kristen kantri na dispela tok long PNG i Kristen kantri i no tru.

Dokta Ezebilo i tok long kantri i kamap Kristen kantri tru, tupela senis i mas kamap;

• I mas i gat tok long Mama Lo; na
• I mas gat Relijen (sios) em gavman i go pas long em.

Em i tok taim dispela ol tok i stap, dispela bai tokaut stret olsem PNG i Kristen kantri.

Em i tok sapos nogat, PNG i tokaut long maus tasol na aninit long lo, dispela i nogat.

Long dispela as Praim Minista James Marape i laik senis (amendment) i mas kamap long  Seksen 45 Priembel bilong Mama Lo.

Marape i laik senis i mas kamap long narapela palamen (2022 Jeneral Ileksen) i kamap.

Em i mekim komitmen long givim K2 milien long komiti i mekim wok bilong em.

Bihainim pasin, Mama Lo na dispela i kisim tu ol Ogenik Lo, sapos senis i mas kamap, gavman i mas kisim tingting bilong manmeri pastaim.

Isifu wantaim CLRC tim i bihainim dispela pasin na i mekim raun bilong kisim tingting bilong ol manmeri pastaim bipo long gavman i ken mekim senis long lo.

Komiti i stat pinis long Hailans rijon na bihain bai go long Momase rijon na bihain long dispela bai go long Niugini Ailan na las long Sauten rijon.

Em i no amamas long sampela provins we bikos long hevi long provinsal edministresen, planti manmeri i no kamap long bekim gut ol askim.

Tasol namel long ol arapela provins long Hailans, em i amamas long Hela Gavana Philip Undialu husat i go pas long provinsal edministresen long kisim ol gut na bekim gut ol askim bilong ol.

Em i tok komiti i givim foapela askim long kisim tingting bilong ol manmeri olsem:

• OL manmeri i ting PNG i Kristen kantri o nogat;
• PNG i mas bihainim ol Kristen Veliu na prinsipel; na
• Dispela ol veliu na prinsipel i mas stap olsem long Seksen 45; na
• Bai i gat mekimsave taim manmeri i brukim ol veliu na prinsipel bilong Kristen.

Ol gavman opis husat i stap insait long dispela inkwairi em CLRC, Dipatmen bilong Praim Minista na Nesenel Ekseketiv Kaunsil, Jastis na Atoni Jeneral na Komyuniti Divelopmen na Relijen.