PASTAIM Primia bilong Morobe, Sir Jerry Nalau i dai.

Em i gat 83 krismas long taim em i dai.

Em i bin dai long biktaun bilong em yet, Lae, Morobe provins long las wik.

Ol planim bodi bilong em long ples bilong em, Gagidu, Finschafen long Tunde dispela wik.

Sir Jerry i wanpela wanskul bilong Papa bilong Kantri, Great Gren Sif Sir Michael Somare long Dregerhafen Haiskul long Finschafen, Morobe Provins.

Long taim Sir Michael i dai, Sir Jerry i bin stori long taim em i bin bungim Sir Michael na i bin wok aninit long em taim Sir Michael i kamap namba wan praim minista.

Em i tok bipo long Independens, kantri i bin stap nabaut na em i bin bung wantaim Sir Michael wantaim ol arapela lida long lukim kantri i kamap wanpela.

Long dispela as ol i kamapim PANGU (Papua and New Guinea United) pati.

Sir Jerry i tok long bungim kantri i kamap wanpela, Sir Michael i bin salim em i go wok long Bogenvil olsem kiap, long Morobe yet na long Wewak, Is Sepik Provins na bihain i go long Simbu Provins long Hailans rijon.

Em i tok Sir Michael i salim em i go long Hailans bikos Sir Michael i ting ol hailans manmeri bai harim tok bilong Jerry.

Em i tok Sir Michael i tok bikos em i tok ol Luteran misineri i bin sua long Finschafen na bihain i bringim Gutnius i go long Hailans. Jerry i bilong Finschafen.

Em i tok Sir Michael i tok ol Hailans bai harim tok bilong Jerry long wanem em i bilong Finschafen na em i bringim Gutnius, Tok bilong God.

Sir Jerry i bin sori tru taim em i harim gutpela pren bilong em, Sir Michael i dai long Februeri long dispela yia.