OL pipel long Bushwara komyuniti long Pot Mosbi Not Is i salim wanpela papa i go pinis long haus sik bihain long ol i painim bodi bilong pikinini meri bilong en las wik Sarere.

Ol i saspek olsem dispela papa bilong Simbu Provins i bin mekim pasin nogut long pikinini meri na bihain kilim em na tromoi long gras.

Ol poto i soim bodi bilong pikinini meri i no stap gut taim ol pipel i painim em.

Dispela papa i bin ranawe taim komyuniti i singaut na toktok long olsem wanem pikinini meri I dai na slip olsem long gras.

Dispela hevi i bin kamap long Sarere Me 15 long san taim olgeta pipel i no stap klostu long haus.

Wanpela husat i givim dispela ripot i tok, yangpela meri i gat 13 krismas na em i mekim gret 4 long Bushwara AOG Praimeri Skul.

Man i givim ripot i tok planti taim ol mamapapa i no save mekim gut long pikinini meri. Ol i save salim em long karim wara long Gordons o was long tupela liklik susa bilong en.

Planti taim mama i save pasim em long no ken go long skul na stap was long tupelo susa na mama i save go pilai kas.

Bodi bilong pikinini meri i stap long mog long tri mail na papa i slip tu long Pot Mosbi Jeneral Haus Sik.

Rosa Koian i raitim