SUMGILBAR lokal level gavman (LLG) long Sumkar distrik, Madang provins long las wik Fonde i bin kisim tupela nupela kar i kam long opis bilong lokal MP, Chris Nangoi.

Tupela Hilux dabol kebin kar em wanpela bai stap long Bibrin kaunsil eria bai yusim na narapela bai stap long Talidig rural polis stese.

Deputi edministreta bilong Sumkar distrik, Thomas Balanga i bin bringim dispela tupela nupela kar i go long Gibrin kaunsil em bai bilong Sumgilbar na i givim i go long han bilong Sumgilbar LLG presiden, Brendon Kennedy.

Balanga taim em i givim dispela tupela kar i tok strong ol polis I mas yusim stret long wok bilong polis na I no mekim ol arapela wok olsem karim ol famili memba raun I go kam.

Mista Kennedy i tok tenkyu long Nangoi na I strongim tingting bilong Nangoi olsem ol bai yusim gutpela dispela ol kar.

Mista Balanga long taim em i givim ki bilong tupela kar i go long Sumgilbar LLG presiden, Kennedy i tok em i bilip ol bai yusim kar gut long sevim ol pipel na ol kaunsila long LLG.

Em i tok polis kar bai helpim ol long karimaut gut lo na oda long Sumgilbar eria.

Ol bai patrol tu I go long Mangem Kea Senta we sampela Manam Setela I stap long em long lukim olsem nogat trabol I kamap long dispela eria.

Dispela seremoni long Gibrin i lukim tu yangpela Kennedy, i soim ples klia pasin o trensparensi taim em i brukim moa long K213,000 em Sumgilbar LLG i kisim long Ramu Nikel Projek na givim long wan wan ol wod memba long LLG.

Deputi Gavana bilong Madang, Samuel Nessau na Madang Provinsal Polis Komanda, Suprinteden Mazuc Rubiang i bin kamap tu long dispela seremoni.

James G. Kila i raitim