Kontrola bilong Nesenel Pandemik Rispon na Komisina bilong Polis, David Manning i singaut long olgeta sitisen long no ken tanim baksait long ol mesa bilong nupela nomol.

Em i mekim dispela singaut bihainim namba bilong COVID-19 dai i go antap long 136 na COVID-19 keis i go antap long 14,206.

Kontrola Manning i tok sapos ol pipel i bihainim gut ol mesa i stap long “Nupela Pasin” bai ol inap long sevim planti laip.

Ol mesa i stap aninit long Nupela Nomol em olsem,

1. Wasim han bilong yu klostu klostu.
2. Stap 1.5 mita longwe long narapela
3. Noken tasim ai, nus na maus bilong yu
4. Tok helo long narapela wantaim smail, surukim het o tok helo tasol na i no ken holim han bilong ol o bamim fist na hai faiv.
5. Kus i go insait long hanskru bilong yu na i no long han bilong yu
6. Daunim pasin bilong bung wantaim narapela na daunim taim yu stap long bung ples.
7. Werim pes mask o karamap long olgeta pablik ples long banisim yu yet na ol arapela; na
8. Klinim na kilim indai ol binatang we i stap long ol samting we yu save tasim klostu klostu

Kontrola Manning i tok ol sitisen i mas no ken lus tingting long dispela birua we ol no inap long lukim i ken bagarapim famili, komyuniti na kantri tu sapos ol i no bihainim ol mesa i stap insait long Nupela Pasin.

Em i tok i no olgeta sitisen i wok long bihainim Nupela Pasin, sampela em ol lusim pinis nupela pasin.

“Mi luksave olsem ol sitisen i save werim mask long karamapim wasket bilong ol tasol na ol i save apim i go antap long nus na maus bilong ol taim ol i lukim ol polis,” Mista Manning i tok.

Kontrola i tok dispela pasin mas no ken kamap, ol pipel i mas werim pes mask olgeta taim long lukautim laip.